ന്യൂഡൽഹി: ജന്തർ മന്തറിൽ നീറ്റ് പരീക്ഷാ ക്രമക്കേടിനെതിരെ കോക്ക്റോച്ച് ജനതാ പാർട്ടി (CJP) നടത്തുന്ന സമരവേദിയിലേക്ക് രാജ്യത്തിന്റെ വിവിധ ഭാഗങ്ങളിൽ നിന്ന് ഡെലിവറി ആപ്പുകൾ വഴി ഭക്ഷണപ്പൊതികളുടെ പ്രവാഹം. ഇന്നത്തേക്ക് ആവശ്യത്തിനുള്ള ഭക്ഷണം എത്തിയെന്നും ഇനി ഫുഡ് ഓർഡറുകൾ അയക്കരുതെന്നും അല്ലാത്തപക്ഷം ഭക്ഷണം പാഴായിപ്പോകുമെന്നും സി.ജെ.പി എക്സിൽ കുറിച്ചു. പിന്തുണ നൽകിയ ഏവർക്കും പാർട്ടി നന്ദി അറിയിച്ചു.(CJP Jantar Mantar NEET Protest Online Food Orders Support Left MPs)
കഴിഞ്ഞ ദിവസം പോലീസ് ഉപരോധത്തെ തുടർന്ന് സമരക്കാർക്ക് ഭക്ഷണമോ വെള്ളമോ ലഭിക്കാത്ത അവസ്ഥയുണ്ടായിരുന്നു. ഇതോടെയാണ് ജന്തർ മന്തർ ലൊക്കേഷനായി നൽകി അഞ്ഞൂറിലധികം ഭക്ഷണപ്പൊതികൾ ബർഗറും സാൻഡ്വിച്ചും കുപ്പിവെള്ളവും ഉൾപ്പെടെ ഓൺലൈനായി സമരവേദിയിലേക്ക് ആളുകൾ അയച്ചുതുടങ്ങിയത്. പോലീസ് തകർത്ത സമരവേദിയിൽ പ്രക്ഷോഭം പുനരാരംഭിച്ചു. കഴിഞ്ഞ ദിവസത്തെ സംഘർഷത്തിൽ പോലീസ് പെല്ലറ്റ് ഗണ്ണുകൾ വരെ പ്രയോഗിച്ചതായി സി.ജെ.പി വക്താവ് അശുതോഷ് റാങ്ക ആരോപിച്ചു.
ഇടത് എം.പിമാർ ഉൾപ്പെടെയുള്ള ജനപ്രതിനിധികൾ ജന്തർ മന്തറിലെത്തി സി.ജെ.പി അധ്യക്ഷൻ അഭിജിത് ദിപ്കെയുമായി സംസാരിക്കുകയും പിന്തുണ അറിയിക്കുകയും ചെയ്തു. കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ രാജി വെക്കേണ്ടതില്ലെന്ന നിലപാടിൽ സർക്കാർ ഉറച്ചുനിൽക്കുന്നു. എന്നാൽ പരീക്ഷാ വീഴ്ചയിലെ രോഷമാണ് രാജ്യത്ത് കാണുന്നതെന്നും മന്ത്രിയുടെ രാജി പ്രധാനമന്ത്രി ചോദിച്ചു വാങ്ങണമെന്നും ആവശ്യമുയർന്നു. സമരത്തിന് പിന്തുണയുമായി നൂറുകണക്കിന് യുവാക്കളാണ് രാവിലെ മുതൽ ജന്തർ മന്തറിലേക്ക് എത്തിയത്.
Story Summary
The Cockroach Janta Party (CJP) urged supporters to stop sending online food orders to their NEET protest site at Jantar Mantar, as sufficient food had already arrived. The unique wave of support through food delivery apps came after police barricaded the site, depriving protesters of food and water. Meanwhile, CJP resumed its protest despite alleged police brutality.
