ന്യൂഡൽഹി: 2026 മെയ് മാസത്തിൽ നടക്കാനിരിക്കുന്ന പത്താം ക്ലാസ് രണ്ടാം ബോർഡ് പരീക്ഷയ്ക്കായി പ്രൈവറ്റ് വിദ്യാർത്ഥികളിൽ നിന്നും സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ അപേക്ഷ ക്ഷണിച്ചു. ആദ്യ സെഷൻ പരീക്ഷ എഴുതിയ വിദ്യാർത്ഥികൾക്ക് മൂന്ന് വിഷയങ്ങളിൽ വരെ സ്കോർ മെച്ചപ്പെടുത്താൻ ഈ പരീക്ഷയിലൂടെ സാധിക്കും. കൂടാതെ, 2025 സെഷനിൽ കമ്പാർട്ട്മെന്റ് ലഭിച്ചവർക്കും മൂന്നാം അവസരമായി ഈ പരീക്ഷ എഴുതാവുന്നതാണ്.(CBSE Class 10th Second Board Exam 2026, Last date for students to apply is April 20)
അപേക്ഷിക്കാൻ അർഹതയുള്ളത് 2024-25 സെഷനിൽ കമ്പാർട്ട്മെന്റ് വിഭാഗത്തിൽപ്പെട്ടവർ (മൂന്നാം അവസരം), ഇതേ സെഷനിൽ അർഹതയുണ്ടായിട്ടും 2026-ലെ പ്രധാന പരീക്ഷയിൽ പങ്കെടുക്കാൻ കഴിയാത്തവർ എന്നിവർക്കാണ്. അപേക്ഷകർ സിബിഎസ്ഇ ഔദ്യോഗിക വെബ്സൈറ്റിലെ “Private Candidate” എന്ന ലിങ്ക് വഴി ഓൺലൈനായി അപേക്ഷ സമർപ്പിക്കണം.
ഓൺലൈൻ അപേക്ഷ സമർപ്പിക്കാനും ഫീസ് അടയ്ക്കാനുമുള്ള സമയക്രമം പുറത്തിറക്കിയിട്ടുണ്ട്. പിഴയില്ലാതെ 2026 ഏപ്രിൽ 16 (ഉച്ചയ്ക്ക് 12 മണി മുതൽ) മുതൽ ഏപ്രിൽ 20 (അർദ്ധരാത്രി) വരെയും, പിഴയോടെ 2026 ഏപ്രിൽ 21 മുതൽ ഏപ്രിൽ 22 (അർദ്ധരാത്രി) വരെയും ചെയ്യാവുന്നതാണ്. നിശ്ചിത തീയതിക്ക് ശേഷം ലഭിക്കുന്ന അപേക്ഷകൾ യാതൊരു കാരണവശാലും സ്വീകരിക്കില്ലെന്ന് ബോർഡ് വ്യക്തമാക്കി. 2026-ലെ പ്രധാന പരീക്ഷയുടെ അതേ സിലബസും പരീക്ഷാ രീതിയുമാണ് രണ്ടാം ബോർഡ് പരീക്ഷയ്ക്കും പിന്തുടരുന്നത്.
അപേക്ഷകൾ ഓൺലൈൻ വഴി മാത്രമേ സ്വീകരിക്കുകയുള്ളൂ. ഓഫ്ലൈൻ അപേക്ഷകൾ അനുവദിക്കില്ല. നെറ്റ് ബാങ്കിംഗ്, ഡെബിറ്റ് കാർഡ്, അല്ലെങ്കിൽ ക്രെഡിറ്റ് കാർഡ് എന്നിവ വഴി ഓൺലൈനായി മാത്രമേ ഫീസ് അടയ്ക്കാൻ കഴിയൂ. ഡിമാൻഡ് ഡ്രാഫ്റ്റ്, ചെക്ക് എന്നിവ സ്വീകരിക്കില്ല. ഫീസ് അടയ്ക്കാത്ത അപേക്ഷകൾ നിരസിക്കും. അപേക്ഷയിൽ നൽകുന്ന നഗരത്തിന്റെ അടിസ്ഥാനത്തിലായിരിക്കും പരീക്ഷാ കേന്ദ്രം അനുവദിക്കുക. ഒരിക്കൽ അനുവദിച്ച കേന്ദ്രത്തിൽ മാറ്റം അനുവദിക്കില്ല. അപേക്ഷകന്റെ ഫോട്ടോയും ഒപ്പും സ്കാൻ ചെയ്ത ഇമേജുകൾ അപ്ലോഡ് ചെയ്യണം. 2025-ലെ പരീക്ഷാ വിവരങ്ങൾ സിസ്റ്റത്തിൽ തനിയെ ലഭ്യമാകുന്ന രീതിയിലാണ് അപേക്ഷാ പോർട്ടൽ ക്രമീകരിച്ചിരിക്കുന്നത്.
