ന്യൂഡൽഹി: രാജ്യത്ത് വർദ്ധിച്ചുവരുന്ന ‘ഡിജിറ്റൽ അറസ്റ്റ്’ തട്ടിപ്പുകൾക്ക് തടയിടാൻ അത്യാധുനിക എഐ ചാറ്റ്ബോട്ടുമായി സിബിഐ. ‘അഭയ്’ എന്ന് പേരിട്ടിരിക്കുന്ന ഈ ചാറ്റ്ബോട്ട് വഴി പൊതുജനങ്ങൾക്ക് തങ്ങൾക്ക് ലഭിക്കുന്ന സിബിഐ നോട്ടിസുകൾ വ്യാജമാണോ എന്ന് നിമിഷങ്ങൾക്കുള്ളിൽ പരിശോധിക്കാൻ സാധിക്കും (CBI AI Chatbot Abhay).
സിബിഐ സ്ഥാപക ഡയറക്ടർ ഡി.പി. കോഹ്ലിയുടെ സ്മരണാർത്ഥം സംഘടിപ്പിക്കുന്ന 22-ാമത് മെമ്മോറിയൽ ലക്ചറിൽ വെച്ച് സുപ്രീം കോടതി ചീഫ് ജസ്റ്റിസ് സൂര്യ കാന്ത് ഇന്ന് ‘അഭയ്’ പുറത്തിറക്കും. സൈബർ കുറ്റകൃത്യങ്ങളും പോലീസിന്റെയും ജുഡീഷ്യറിയുടെയും പങ്ക് എന്ന വിഷയത്തിൽ അദ്ദേഹം പ്രഭാഷണവും നടത്തും.
എന്താണ് ‘അഭയ്’?
സിബിഐ ഉദ്യോഗസ്ഥരെന്ന വ്യാജേന തട്ടിപ്പുകാർ ആളുകളെ വിളിച്ച് ഡിജിറ്റൽ അറസ്റ്റ് ഭീഷണി മുഴക്കുകയും കോടിക്കണക്കിന് രൂപ തട്ടിയെടുക്കുകയും ചെയ്യുന്നത് പതിവായ സാഹചര്യത്തിലാണ് സിബിഐ ഈ നീക്കം നടത്തുന്നത്. സിബിഐ അയച്ചതെന്ന് അവകാശപ്പെട്ട് ലഭിക്കുന്ന നോട്ടിസുകളിലെ വിവരങ്ങൾ ഈ ചാറ്റ്ബോട്ടിൽ നൽകിയാൽ അതിന്റെ ആധികാരികത പരിശോധിക്കപ്പെടും. സൈബർ തട്ടിപ്പുകളിലൂടെ രാജ്യത്ത് ഏകദേശം 54,000 കോടി രൂപ കവർന്നെടുക്കപ്പെട്ടതായി സുപ്രീം കോടതി അടുത്തിടെ വ്യക്തമാക്കിയിരുന്നു. ഇത്തരം തട്ടിപ്പുകളെ ‘കവർച്ച’ എന്നാണ് കോടതി വിശേഷിപ്പിച്ചത്.
Summary: The Central Bureau of Investigation (CBI) is launching an AI-powered chatbot named ‘Abhay’ to combat digital arrest frauds. Chief Justice of India Surya Kant will unveil the chatbot today during the 22nd D P Kohli Memorial Lecture. ‘Abhay’ allows the public to verify the authenticity of notices purportedly issued by the CBI, addressing the rising trend of scammers posing as agency officials. This initiative follows Supreme Court concerns over cybercriminals siphoning off Rs 54,000 crore through various scams.
