പൂനെ:മുംബൈയിൽ സാധാരണക്കാരുടെ കുടുംബ ബഡ്ജറ്റുകൾക്ക് വീണ്ടും തിരിച്ചടി. അടുത്തിടെയുണ്ടായ പാലിന്റെയും ഇന്ധനത്തിന്റെയും വിലവർദ്ധനവിന് പിന്നാലെ നഗരത്തിലും പരിസര പ്രദേശങ്ങളിലും ബ്രെഡ് വിലയും കുത്തനെ ഉയർന്നു (Mumbai bread price hike). പ്രമുഖ ബ്രെഡ് നിർമ്മാതാക്കളായ ‘മോഡേൺ ബ്രെഡ്’ (Modern Bread) വിവിധയിനം ബ്രെഡുകൾക്ക് പാക്കറ്റിന് 5 രൂപ വരെയാണ് വർദ്ധിപ്പിച്ചിരിക്കുന്നത്. വരും ദിവസങ്ങളിൽ ബ്രിട്ടാനിയ ഇൻഡസ്ട്രീസ്, വിബ്സ് (Wibs) തുടങ്ങിയ മറ്റ് പ്രമുഖ ബ്രാൻഡുകളും വില ഉയർത്തിയേക്കുമെന്നാണ് റിപ്പോർട്ടുകൾ.
പാക്കേജിംഗിനായി ഉപയോഗിക്കുന്ന പ്ലാസ്റ്റിക് അസംസ്കൃത വസ്തുക്കളുടെ വിലക്കയറ്റമാണ് ബ്രെഡ് വില വർദ്ധിക്കാൻ പ്രധാന കാരണമായി വിപണി വിദഗ്ധർ ചൂണ്ടിക്കാണിക്കുന്നത്. ഇന്ത്യ വൻതോതിൽ ഇറക്കുമതി ചെയ്യുന്ന ഇത്തരം പ്ലാസ്റ്റിക്കുകൾക്ക്, രൂപയുടെ മൂല്യത്തകർച്ച കാരണം ചെലവ് വർദ്ധിച്ചിട്ടുണ്ട്.
പെട്രോൾ, ഡീസൽ വിലയിലുണ്ടായ വർദ്ധനവ് ഉൽപ്പന്നങ്ങളുടെ വിതരണ-ഗതാഗത ചെലവുകൾ ഇരട്ടിയാക്കി.ബ്രെഡ് നിർമ്മാണത്തിന് ആവശ്യമായ പ്രിസർവേറ്റീവുകൾ, ഉപ്പ് തുടങ്ങിയ മറ്റ് ചേരുവകളുടെ വിലയും സമീപകാലത്ത് വർദ്ധിച്ചിട്ടുണ്ട്.
പുതിയ വിലവിവരങ്ങൾ ഇങ്ങനെ:
മുംബൈയിലെ വിവിധയിടങ്ങളിൽ പുതുക്കിയ വില നിലവിൽ വന്നുകഴിഞ്ഞു.
സാൻഡ്വിച്ച് ബ്രെഡ് (400 ഗ്രാം): 40 രൂപയിൽ നിന്ന് 45 രൂപയായി ഉയർന്നു.
ഹോൾ വീറ്റ് ബ്രെഡ്: 55 രൂപയിൽ നിന്ന് 60 രൂപയായി.
മൾട്ടിഗ്രെയ്ൻ ബ്രെഡ്: 60 രൂപയിൽ നിന്ന് 65 രൂപയായി.
ബ്രൗൺ ബ്രെഡ്: 45 രൂപയിൽ നിന്ന് 50 രൂപയായി.
ചെറിയ പാക്കറ്റുകൾക്കും വില ഉയർന്നിട്ടുണ്ട്. ചെറിയ വൈറ്റ് ബ്രെഡ് പാക്കറ്റിന് 20 രൂപയിൽ നിന്ന് 22 രൂപയായും, ചെറിയ ബ്രൗൺ ബ്രെഡിന് 28 രൂപയിൽ നിന്ന് 30 രൂപയായും വില വർദ്ധിച്ചു. വർദ്ധിച്ചുവരുന്ന പാക്കേജിംഗ്, ഗതാഗത ചെലവുകൾ കാരണം പഴയ വിലയ്ക്ക് വിപണിയിൽ തുടരുക എന്നത് വലിയ പ്രതിസന്ധിയാണെന്ന് പ്രാദേശിക ബേക്കറി ഉടമകളും വ്യക്തമാക്കുന്നു. പശ്ചിമേഷ്യൻ പ്രതിസന്ധിയെത്തുടർന്ന് ആഗോളതലത്തിൽ ക്രൂഡ് ഓയിൽ വില ഉയർന്നതാണ് ഇന്ധനവിലയെയും തുടർന്ന് നിത്യോപയോഗ സാധനങ്ങളുടെ വിലയെയും ബാധിച്ചിരിക്കുന്നത്.
Story Summary : Bread prices in Mumbai and nearby areas have surged by up to ₹5 per packet following recent hikes in milk and fuel prices. Key manufacturers like Modern Bread have updated their rates due to the rising costs of packaging materials, transportation, and raw ingredients.
