ബെംഗളൂരു: നഗരത്തിൽ ‘സോംബി ഡ്രഗ്’ ഉപയോഗിച്ച ആളെ കണ്ടെത്തിയെന്ന തരത്തിൽ പ്രചരിച്ച വീഡിയോയുടെ സത്യാവസ്ഥ വെളിപ്പെടുത്തി ബെംഗളൂരു പോലീസ് (Bengaluru Zombie Drug Viral Video Truth). യുവാവ് യാതൊരുവിധ ലഹരിമരുന്നുകളും ഉപയോഗിച്ചിട്ടില്ലെന്നും തെറ്റായ വിവരങ്ങൾ പ്രചരിപ്പിക്കരുതെന്നും പോലീസ് അഭ്യർത്ഥിച്ചു. യെലഹങ്കയിലെ നിട്ടെ മീനാക്ഷി ഇൻസ്റ്റിറ്റ്യൂട്ടിന് സമീപം ഒരാൾ അനക്കമില്ലാതെ നിൽക്കുന്ന വീഡിയോ സമൂഹമാധ്യമങ്ങളിൽ വൈറലായതോടെയാണ് പരിഭ്രാന്തി പരന്നത്.
വീഡിയോ ശ്രദ്ധയിൽപ്പെട്ടതിനെത്തുടർന്ന് ബാഗലൂർ പോലീസ് യുവാവിനെ കണ്ടെത്തുകയും വിശദമായ വൈദ്യപരിശോധനയ്ക്ക് വിധേയനാക്കുകയും ചെയ്തു. പരിശോധനാ റിപ്പോർട്ടിൽ ഇയാൾ ലഹരിമരുന്നുകൾ ഉപയോഗിച്ചതായി സൂചനയില്ല. യുവാവ് സന്ധിവാതം ബാധിച്ച വ്യക്തിയാണെന്നും വേദന സംഹാരികൾക്കൊപ്പം മദ്യം കഴിച്ചതുമാണ് അബോധാവസ്ഥയിലാകാൻ കാരണമെന്നും പോലീസ് അറിയിച്ചു. ഇയാൾ ജോലി അന്വേഷിച്ച് മൂന്ന് മാസം മുൻപാണ് ബെംഗളൂരുവിൽ എത്തിയത്.
വ്യക്തികളെ അപകീർത്തിപ്പെടുത്തുന്ന രീതിയിലും അനാവശ്യ ഭീതി പരത്തുന്ന രീതിയിലും വ്യാജവാർത്തകൾ പ്രചരിപ്പിക്കുന്നവർക്കെതിരെ കർശന നടപടി സ്വീകരിക്കുമെന്ന് പോലീസ് മുന്നറിയിപ്പ് നൽകി. ലഹരിമരുന്നുകൾക്കെതിരെ വിട്ടുവീഴ്ചയില്ലാത്ത നിലപാടാണ് പോലീസിനുള്ളതെന്നും ഇത്തരം സാഹചര്യങ്ങളിൽ വീഡിയോ പ്രചരിപ്പിക്കുന്നതിന് പകരം ഉദ്യോഗസ്ഥരെ വിവരം അറിയിക്കണമെന്നും അധികൃതർ കൂട്ടിചേർത്തു. സമൂഹമാധ്യമങ്ങളിൽ ദൃശ്യങ്ങൾ പ്രചരിച്ചതോടെ സിന്തറ്റിക് ഡ്രഗ്ഗുകൾ ബെംഗളൂരുവിൽ വ്യാപകമാണെന്ന തരത്തിൽ വലിയ ചർച്ചകൾ ഉയർന്നിരുന്നു. എന്നാൽ പോലീസ് ഇടപെടലിലൂടെ ഈ വ്യാജപ്രചരണത്തിന് അറുതിയായിരിക്കുകയാണ്.
Summary: Bengaluru police have debunked viral claims that a disoriented man seen in a social media video was under the influence of a “zombie drug.” Medical examinations confirmed no traces of narcotics; instead, the man, who suffers from arthritis, had taken prescribed pain medication along with alcohol. Police urged the public to stop spreading unverified information that creates panic and warned of strict action against rumor-mongers.
