ന്യൂഡൽഹി: ഒരു മാസം നീണ്ടുനിന്ന ഇന്ത്യ സന്ദർശനത്തിനായി 10 ലക്ഷത്തോളം രൂപ (10,605 ഡോളർ) ചിലവഴിച്ച അമേരിക്കൻ ദമ്പതികളുടെ യാത്രാവിവരങ്ങൾ സോഷ്യൽ മീഡിയയിൽ കടുത്ത ചർച്ചകൾക്ക് വഴിവെക്കുന്നു (American Couple India Trip Luxury Budget). ഇൻസ്റ്റാഗ്രാമിലൂടെ തങ്ങളുടെ യാത്രാനുഭവങ്ങളും ചിലവുകളും പങ്കുവെച്ച അലക്സ്, അമേലിയ എന്നീ സഞ്ചാരികളാണ് തങ്ങളുടെ കണക്കുകൾ പ്രതീക്ഷിച്ചതിലും വളരെ കൂടുതലാണെന്ന് തുറന്നുസമ്മതിച്ചത്. ഇന്ത്യയിലെ 13 പ്രധാന നഗരങ്ങളിലൂടെയായിരുന്നു ഇവരുടെ യാത്ര. സാധാരണ ബഡ്ജറ്റ് ട്രാവലർമാരെപ്പോലെ കുറഞ്ഞ ചിലവിലുള്ള യാത്രാമാർഗ്ഗങ്ങൾ തിരഞ്ഞെടുക്കുന്നതിന് പകരം പ്രീമിയം അനുഭവങ്ങൾക്കും ആഡംബര താമസസൌകര്യങ്ങൾക്കും മുൻഗണന നൽകിയതാണ് തുക ഇത്രയധികം ഉയരാൻ കാരണമെന്ന് ദമ്പതികൾ വ്യക്തമാക്കുന്നു. പ്രതിദിനം ശരാശരി 33,627 രൂപയോളമാണ് ഇവർ ഇന്ത്യയിൽ ചിലവഴിച്ചത്.
യാത്രയ്ക്കായി വലിയ തുക ചിലവായതാണ് ഇതിൽ പ്രധാനമെന്ന് ഇവർ ചൂണ്ടിക്കാണിക്കുന്നു. കുറഞ്ഞ ദിവസങ്ങൾക്കുള്ളിൽ കൂടുതൽ നഗരങ്ങൾ സന്ദർശിക്കേണ്ടി വന്നതിനാൽ ആറ് വിമാന സർവീസുകൾ, ആറ് പ്രൈവറ്റ് കാർ യാത്രകൾ, രണ്ട് ട്രെയിൻ യാത്രകൾ എന്നിവ ഇവർക്ക് നടത്തേണ്ടി വന്നു. കൂടാതെ സാധാരണക്കാർ പറയുന്നതുപോലെ ഇന്ത്യയിലെ താമസം അത്ര കുറഞ്ഞ ചിലവിലുള്ളതല്ലെന്നും പ്രീമിയം ഹോട്ടലുകൾക്ക് ഒരു രാത്രിക്ക് ശരാശരി 12,064 രൂപയോളം ചിലവ് വന്നതായും ഇവർ പറയുന്നു. മൂന്ന് നേരത്തെ ഭക്ഷണത്തിനായും വലിയ തുക നീക്കിവെക്കേണ്ടി വന്നു. ഈ പോസ്റ്റ് വൈറലായതോടെ സമ്മിശ്ര പ്രതികരണങ്ങളാണ് ആളുകളിൽ നിന്നും ഉണ്ടാകുന്നത്. ഇന്ത്യയിൽ കുറഞ്ഞ ചിലവിൽ യാത്ര ചെയ്യാൻ സാധിക്കുമെങ്കിലും രാജകീയ സൗകര്യങ്ങൾ വേണമെങ്കിൽ ഇത്രയും തുകയാകുന്നത് സ്വാഭാവികമാണെന്നും പലരും കമന്റ് ചെയ്തു.
View this post on Instagram
