പഞ്ചാബ് പോലീസ് ഇന്റലിജൻസ് ആസ്ഥാനത്തിനു നേരെ ഗ്രനേഡ് ആക്രമണം നടത്തിയ പ്രതി പിടിയിൽ
Jan 25, 2023, 20:04 IST
മൊഹാലി: പഞ്ചാബ് പോലീസ് ഇന്റലിജൻസ് ആസ്ഥാനത്തിനു നേരെ ഗ്രനേഡ് ആക്രമണം നടത്തിയ പ്രതി പിടിയിൽ. ഹരിയാന ഝാജർ ജില്ലയിലെ സുരക്പൂർ സ്വദേശി ദീപക് രംഗയെയാണ് അറസ്റ്റ് ചെയ്തത്. കഴിഞ്ഞ വർഷം മെയ് മാസത്തിലായിരുന്നു സംഭവം നടന്നത്. ഇതിനു ശേഷം ഇയാൾ ഒളിവിലായിരുന്നു. ഇന്റലിജൻസ് ആസ്ഥാനത്തിനു നേർക്ക് റോക്കറ്റ് പ്രൊപ്പൽഡ് ഗ്രനേഡ് (ആർപിജി) എറിയുകയായിരുന്നു. ഉത്തർപ്രദേശിലെ ഗൊരഖ്പുരിൽ നിന്ന് ബുധനാഴ്ച രാവിലെ എൻഐഎയാണ് പ്രതിയെ അറസ്റ്റ് ചെയ്തത്. കാനഡ ആസ്ഥാനമായി പ്രവർത്തിക്കുന്ന 'ലാൻഡ' എന്ന ലഖ്ബീർ സിംഗ് സന്ധുവിന്റെയും പാക്കിസ്ഥാൻ ആസ്ഥാനമായി പ്രവർത്തിക്കുന്ന 'റിൻഡ' എന്ന ഹർവിന്ദർ സിംഗ് സന്ധുവിന്റെയും അടുത്ത ആളാണ് രംഗ. കൊലപാതകങ്ങൾ ഉൾപ്പെടെ നിരവധി തീവ്രവാദ, ക്രിമിനൽ കേസുകളിൽ പ്രതിയാണ്.