ന്യൂഡൽഹി: ബംഗ്ലാദേശിലെ സുരക്ഷാ സാഹചര്യങ്ങൾ വഷളാകുന്ന പശ്ചാത്തലത്തിൽ രാജ്ഷാഹിയിലെയും ഖുൽനയിലെയും ഇന്ത്യൻ വിസ അപേക്ഷാ കേന്ദ്രങ്ങൾ ഇന്ത്യ അടച്ചുപൂട്ടി. ഇന്ത്യൻ ഹൈക്കമ്മീഷന് നേരെയുള്ള ഭീഷണികളും ബംഗ്ലാദേശ് രാഷ്ട്രീയ നേതാക്കളുടെ പ്രകോപനപരമായ ഇന്ത്യ വിരുദ്ധ പ്രസ്താവനകളുമാണ് പെട്ടെന്നുള്ള ഈ നീക്കത്തിന് പിന്നിൽ.(India closes visa centers in Bangladesh due to security threats)
ധാക്കയിലെ ഇന്ത്യൻ ഹൈക്കമ്മീഷന് നേരെയുണ്ടായ തുടർച്ചയായ ഭീഷണികൾ കണക്കിലെടുത്താണ് വിസ കേന്ദ്രങ്ങളുടെ പ്രവർത്തനം നിർത്തിവെച്ചത്. ഇന്ത്യയുടെ വടക്കുകിഴക്കൻ സംസ്ഥാനങ്ങളെ ലക്ഷ്യം വെച്ച് ബംഗ്ലാദേശ് നാഷണൽ സിറ്റിസൺ പാർട്ടി നേതാവ് ഹസ്നത്ത് അബ്ദുള്ള നടത്തിയ 'അറുത്തുമാറ്റും' എന്ന ഭീഷണി സ്ഥിതിഗതികൾ സങ്കീർണ്ണമാക്കി. വിസ സമർപ്പിക്കാൻ മുൻകൂട്ടി അനുമതിയെടുത്തവർക്ക് പിന്നീട് പുതിയ സ്ലോട്ടുകൾ നൽകുമെന്ന് ഐ.വി.എ.സി അറിയിച്ചു.
ബംഗ്ലാദേശ് വിദേശകാര്യ മന്ത്രാലയം ഇന്ത്യൻ പ്രതിനിധി പ്രണയ് വർമ്മയെ വിളിച്ച് പ്രതിഷേധം അറിയിച്ചതിന് പിന്നാലെയാണ് വിസ കേന്ദ്രങ്ങൾ പൂട്ടാനുള്ള തീരുമാനം പുറത്തുവരുന്നത്. ഇന്ത്യയിൽ അഭയം തേടിയിരിക്കുന്ന മുൻ പ്രധാനമന്ത്രി ഷെയ്ഖ് ഹസീന പ്രകോപനപരമായ പ്രസ്താവനകൾ നടത്തുന്നുവെന്നാണ് ബംഗ്ലാദേശിന്റെ ആരോപണം. എന്നാൽ ബംഗ്ലാദേശിന്റെ താത്പര്യങ്ങൾക്ക് ഹാനികരമായ പ്രവർത്തനങ്ങൾ ഇന്ത്യ അനുവദിക്കാറില്ലെന്ന് പ്രണയ് വർമ്മ മറുപടി നൽകി.