കൊച്ചി: ലോകമെമ്പാടുമുള്ള ഫുട്ബോൾ പ്രേമികൾ കാത്തിരിക്കുന്ന ലോകകപ്പ് മത്സരങ്ങളുടെ ആവേശം മലയാളികളിലേക്ക് ഉൾപ്പെടെ തത്സമയം എത്തിക്കാൻ വിപുലമായ സംപ്രേക്ഷണ സംവിധാനങ്ങളൊരുക്കി പ്രമുഖ ഒടിടി പ്ലാറ്റ്ഫോമായ സീ ഫൈവ് (ZEE5 World Cup live). മത്സരങ്ങളുടെ തത്സമയ വിവരണത്തിനും (Commentary) ആഴത്തിലുള്ള സാങ്കേതിക വിശകലനത്തിനുമായി ഇന്ത്യയിലെയും അന്താരാഷ്ട്ര തലത്തിലെയും പ്രമുഖ മുൻകാല ഫുട്ബോൾ താരങ്ങളും ജനപ്രിയ കമന്റേറ്റർമാരും സീ ഫൈവിനൊപ്പം അണിനിരക്കും.
ഫുട്ബോൾ ആരാധകരുടെ പ്രാദേശിക അഭിരുചികൾ കണക്കിലെടുത്ത് ഹിന്ദി, ഇംഗ്ലീഷ്, മലയാളം, ബംഗ്ലാ എന്നീ നാല് പ്രധാന ഭാഷകളിലാണ് ഇത്തവണ സീ ഫൈവ് കളിവിവരണം ഒരുക്കിയിരിക്കുന്നത്. മലയാളി കായികപ്രേമികൾക്ക് ആവേശം കൂട്ടാൻ ജനപ്രിയ കമന്റേറ്റർമാരായ ഷൈജു ദാമോദരൻ, ഷിയാസ് മുഹമ്മദ് എന്നിവർക്കൊപ്പം ഇന്ത്യൻ ഫുട്ബോളിന്റെ കറുത്ത മുത്ത് ഐ.എം. വിജയൻ, മുൻ ഇന്ത്യൻ താരം ജോ പോൾ അഞ്ചേരി എന്നിവരും മലയാളം കമന്ററി ബോക്സിൽ മൈക്കുമായി എത്തും.
ഇംഗ്ലീഷ് കമന്ററിക്കായി മുൻ ഇന്ത്യൻ പുരുഷ ഫുട്ബോൾ ടീം പരിശീലകൻ ഈഗർ സ്റ്റിമാച്ച്, മുൻ ഇതിഹാസ ക്യാപ്റ്റൻ ബൈചുങ് ബൂട്ടിയ, മുൻ ഇംഗ്ലണ്ട് താരങ്ങളായ പോൾ മാസെഫീൽഡ്, ആഷ്ലി വെസ്റ്റവുഡ്, പ്രശസ്ത സ്പോർട്സ് ജേണലിസ്റ്റ് സീമ ജസ്വാൾ എന്നിവരാണ് അണിനിരക്കുക. ഹിന്ദിയിൽ നിലവിലെ ഇന്ത്യൻ ഗോൾകീപ്പർ ഗുർപ്രീത് സിങ് സന്ധു, മുൻ വനിതാ താരം അദിതി ചൗഹാൻ, മെറാജുദീൻ വാദൂ എന്നിവർക്കൊപ്പം മനീഷ് ബട്ടാവിയ, അതിഷ് തുക്രൽ, സാഹിൽ ഖട്ടർ, അർപിത് ശർമ, അർജുൻ പണ്ഡിറ്റ് എന്നിവരും കളിവിവരണം നൽകും. സ്മാർട്ട് ഫോണുകളിലും സ്മാർട്ട് ടിവികളിലും സീ ഫൈവ് ആപ്പ് വഴി പ്രേക്ഷകർക്ക് ഈ ദൃശ്യവിരുന്ന് ആസ്വദിക്കാമെന്ന് അധികൃതർ വ്യക്തമാക്കി.
Story Summary:
ZEE5 is gearing up for a grand broadcast of the FIFA World Cup with expert commentary in Malayalam, English, Hindi, and Bangla. Popular figures like Shaiju Damodaran, I.M. Vijayan, and Jo Paul Ancheri will lead the Malayalam commentary, while Baichung Bhutia, Igor Stimac, and former England stars will handle the English broadcast, making it a star-studded experience for football fans.
