ആലപ്പുഴ: കോൺഗ്രസിനുള്ളിലെ മുഖ്യമന്ത്രി പദത്തെച്ചൊല്ലിയുള്ള തർക്കങ്ങളിൽ രൂക്ഷമായ പരിഹാസവും നിരീക്ഷണങ്ങളുമായി എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ (Vellappally Natesan on KC Venugopal). കെ.സി. വേണുഗോപാൽ മികച്ച സംഘാടകനാണെന്നും എന്നാൽ വി.ഡി. സതീശൻ ടിവിയിൽ മാത്രമാണ് സജീവമെന്നും അദ്ദേഹം പറഞ്ഞു.
തിരഞ്ഞെടുപ്പിൽ സ്ഥാനാർത്ഥി നിർണ്ണയം മുതൽ ഫണ്ട് കൈകാര്യം ചെയ്യുന്നതിൽ വരെ കെ.സി. വേണുഗോപാൽ വലിയ മിടുക്ക് കാണിച്ചു. പാർട്ടിക്കുള്ളിലെ പ്രശ്നങ്ങൾ പരിഹരിക്കുന്നതിൽ അദ്ദേഹം പിന്നണിയിൽ നിന്ന് നിർണ്ണായക പങ്കുവഹിച്ചു. ഹിന്ദി, ഇംഗ്ലീഷ് ഭാഷകളിലെ പ്രാവീണ്യവും ഉത്തരേന്ത്യയിലെ സ്വാധീനവും അദ്ദേഹത്തിന്റെ കരുത്താണെന്നും വെള്ളാപ്പള്ളി ചൂണ്ടിക്കാട്ടി. വി.ഡി. സതീശൻ ടിവി ക്യാമറകൾക്ക് മുന്നിൽ വന്ന് കാര്യങ്ങൾ പറയുന്നുണ്ടെങ്കിലും യഥാർത്ഥത്തിൽ കാര്യങ്ങൾ നിയന്ത്രിച്ചത് വേണുഗോപാലാണ്. കോൺഗ്രസിൽ പല ഗ്രൂപ്പുകൾ അധികാരം പങ്കിടാൻ ശ്രമിക്കുമ്പോൾ ഇടതുപക്ഷത്ത് പിണറായി വിജയൻ എന്ന ഏക നേതൃത്വമാണുള്ളതെന്നും അദ്ദേഹം പറഞ്ഞു. തിരഞ്ഞെടുപ്പ് ഫലം വരുന്നതിന് മുൻപ് തന്നെ മുഖ്യമന്ത്രി കസേരയ്ക്കായി അടി തുടങ്ങുന്നത് കോൺഗ്രസിന്റെ പാരമ്പര്യമാണ്. അധികാരം കിട്ടിയാലും ഇല്ലെങ്കിലും അവർ തമ്മിലടിക്കുമെന്നും വെള്ളാപ്പള്ളി പരിഹസിച്ചു.
കോൺഗ്രസ് നേതാക്കൾ മുഖ്യമന്ത്രി സ്ഥാനത്തിനായി ഡൽഹിയിൽ നടത്തുന്ന നീക്കങ്ങളെക്കുറിച്ച് നേരത്തെ മന്ത്രി വി. ശിവൻകുട്ടിയും പരിഹാസവുമായി രംഗത്തെത്തിയിരുന്നു. ഇതിന് പിന്നാലെയാണ് വെള്ളാപ്പള്ളിയുടെ ഈ പ്രതികരണം.
Summary: Vellappally Natesan praised K.C. Venugopal as a skillful strategist while mocking V.D. Satheesan, saying he is only active on TV. Natesan remarked that Venugopal played a key role behind the scenes in candidate selection and fund management during the elections. He criticized the internal scramble for the Chief Minister’s post in Congress before the election results, comparing it unfavorably to the single leadership of Pinarayi Vijayan in the LDF.
