Follow on Google News
ഇടുക്കി: മാസങ്ങൾ നീണ്ട നിയമസഭാ തെരഞ്ഞെടുപ്പ് പ്രചാരണങ്ങളുടെ ക്ഷീണമകറ്റാൻ ഹൈറേഞ്ചിന്റെ തണുപ്പിലേക്ക് മടങ്ങി പ്രതിപക്ഷ നേതാവ് വി.ഡി. സതീശൻ (V D Satheesan Kuttikkanam Trekking). കുട്ടിക്കാനത്തെ മലനിരകളിൽ ട്രെക്കിംഗ് നടത്തുന്നതിന്റെയും സുഹൃത്തുക്കൾക്കൊപ്പം സമയം ചെലവഴിക്കുന്നതിന്റെയും വീഡിയോ ദൃശ്യങ്ങൾ പുറത്തുവന്നു.
കോൺഗ്രസ് ഡിജിറ്റൽ മീഡിയ സെൽ കോ-ഓർഡിനേറ്റർ താര ടോജോ അലക്സാണ് സതീശന്റെ അവധിക്കാല ദൃശ്യങ്ങൾ സോഷ്യൽ മീഡിയയിൽ പങ്കുവെച്ചത്. “വനത്തിലാണ്…. വനവാസത്തിലല്ല” എന്ന കൗതുകകരമായ കുറിപ്പോടെയാണ് വീഡിയോ പോസ്റ്റ് ചെയ്തിരിക്കുന്നത്.
യുഡിഎഫിന് മികച്ച വിജയം നേടിക്കൊടുക്കാനായില്ലെങ്കിൽ താൻ ‘രാഷ്ട്രീയ വനവാസത്തിന്’ പോകുമെന്ന് പ്രചാരണവേളയിൽ സതീശൻ പ്രഖ്യാപിച്ചിരുന്നു. ഈ പ്രസ്താവനയുമായി ബന്ധപ്പെടുത്തി സോഷ്യൽ മീഡിയയിൽ ചർച്ചകൾ കൊഴുക്കുന്നതിനിടയിലാണ് താര ടോജോയുടെ വിശദീകരണ കുറിപ്പ്.
വനയാത്രകളും ട്രെക്കിംഗും തനിക്ക് ഏറെ പ്രിയപ്പെട്ടതാണെന്നും തെരഞ്ഞെടുപ്പിന് ശേഷം കാടുകയറാൻ പോകുമെന്നും സതീശൻ നേരത്തെ തന്നെ വ്യക്തമാക്കിയിരുന്നു.
തെരഞ്ഞെടുപ്പ് ഫലം വരാൻ ദിവസങ്ങൾ മാത്രം ബാക്കിനിൽക്കെ, അടുത്ത സുഹൃത്തുക്കൾക്കൊപ്പം കുട്ടിക്കാനത്തെ റിസോർട്ടിലാണ് അദ്ദേഹം താമസം. രാഷ്ട്രീയ സമ്മർദ്ദങ്ങളിൽ നിന്ന് പൂർണ്ണമായും വിട്ടുമാറി പ്രകൃതിയോട് ഇണങ്ങി നിൽക്കുന്നതിലൂടെ ഒരു ചെറിയ ഇടവേളയാണ് അദ്ദേഹം ലക്ഷ്യമിടുന്നത്. വോട്ടെണ്ണൽ ദിവസം വരാനിരിക്കെ, തികഞ്ഞ ആത്മവിശ്വാസത്തിലാണ് പ്രതിപക്ഷ നേതാവ്.
Story Summary: Leader of Opposition V.D. Satheesan is spending a post-election break in Kuttikkanam, Idukki, engaging in trekking. A viral video shared by Tara Tojo Alex clarified that he is “in the forest, not in exile,” referring to his previous statement about quitting politics if UDF loses.
