തൃശൂർ: ക്രിമിനൽ കേസുകളിൽ പ്രതിയായ ഗുണ്ടയുടെ വിവാഹ സൽക്കാരത്തിൽ പങ്കെടുത്ത രണ്ട് പോലീസുകാരെ സർവീസിൽ നിന്നും സസ്പെൻഡ് ചെയ്തു (Thrissur Police Suspension). അന്തിക്കാട് പോലീസ് സ്റ്റേഷനിലെ സിവിൽ പോലീസ് ഓഫീസർമാരായ അമൽദേവ്, മുഹിബ് റഹ്മാൻ എന്നിവർക്കെതിരെയാണ് നടപടി. തൃശൂർ റൂറൽ എസ്.പി ബി. കൃഷ്ണകുമാർ ആണ് സസ്പെൻഷൻ ഉത്തരവിറക്കിയത്. നിരവധി ക്രിമിനൽ കേസുകളിൽ പ്രതിയായ മണലൂർ സ്വദേശിയായ ഗുണ്ടയുടെ വിവാഹ വിരുന്നിലാണ് പോലീസുകാർ അതിഥികളായെത്തിയത്. ഗുണ്ടകളുമായും സാമൂഹിക വിരുദ്ധരുമായും പോലീസ് ഉദ്യോഗസ്ഥർ അടുത്ത ബന്ധം പുലർത്തുന്നത് പോലീസ് സേനയുടെ അന്തസ്സിനും അച്ചടക്കത്തിനും നിരക്കാത്തതാണെന്ന് കണ്ടെത്തിയതിനെ തുടർന്നാണ് നടപടി സ്വീകരിച്ചത്.
രണ്ട് ദിവസം മുൻപാണ് പോലീസുകാർക്കെതിരെയുള്ള നടപടി ഉണ്ടായത്. സംഭവത്തെക്കുറിച്ച് സ്പെഷ്യൽ ബ്രാഞ്ച് വിശദമായ അന്വേഷണം നടത്തി വരികയാണ്. വിവാഹ വിരുന്നിൽ മറ്റ് പോലീസുകാർ ആരെങ്കിലും പങ്കെടുത്തിട്ടുണ്ടോ എന്നും പരിശോധിക്കുന്നുണ്ട്. വരും ദിവസങ്ങളിൽ കൂടുതൽ പേർക്കെതിരെ നടപടിയുണ്ടാകുമെന്നാണ് സൂചന. ഗുണ്ട-പോലീസ് ബന്ധം തടയുന്നതിന്റെ ഭാഗമായി കർശന നടപടികളുമായി മുന്നോട്ട് പോകാനാണ് പോലീസ് ഉന്നത ഉദ്യോഗസ്ഥരുടെ തീരുമാനം.
Story Summary: Two civil police officers from Anthikad police station, Amaldev and Muhib Rahman, were suspended after attending the wedding feast of a known criminal in Manalur. Thrissur Rural SP B. Krishnakumar issued the orders following a Special Branch report, stating their actions tarnished the force’s reputation.
