തിരുവനന്തപുരം: ആഗോള താപനില റെക്കോർഡ് വേഗതയിൽ ഉയർത്താനും ആഗോള കാലാവസ്ഥയെ തകിടം മറിക്കാനും കെൽപ്പുള്ള ‘സൂപ്പർ എൽനിനോ’ പ്രതിഭാസം വരും മാസങ്ങളിൽ ശക്തമാകുമെന്ന് ഐക്യരാഷ്ട്രസഭയുടെ കാലാവസ്ഥാ ഏജൻസിയായ ലോക കാലാവസ്ഥാ സംഘടന അടിയന്തിര മുന്നറിയിപ്പ് നൽകി (Super El Nino Weather Warning). നിലവിലെ എൽനിനോ പ്രതിഭാസത്തിന്റെ തീവ്രത എത്രത്തോളമായിരിക്കുമെന്നതിൽ നേരിയ അനിശ്ചിതത്വം നിലനിൽക്കുന്നുണ്ടെങ്കിലും, ലോകരാജ്യങ്ങൾ അടിയന്തിര മുൻകരുതലുകൾ സ്വീകരിക്കണമെന്ന് സംഘടന ആവശ്യപ്പെട്ടു. സാധാരണയായി ഒൻപത് മുതൽ 12 മാസം വരെ നീണ്ടുനിൽക്കുന്ന ഈ പ്രതിഭാസം ഇത്തവണ നവംബർ വരെ തുടർന്നേക്കുമെന്നാണ് പ്രവചനം. മനുഷ്യന്റെ അനിയന്ത്രിതമായ ഇടപെടലുകൾ കാരണം സംഭവിച്ച ആഗോള താപനത്തിന്റെ പശ്ചാത്തലത്തിൽ എത്തുന്ന എൽനിനോ, കത്തുന്ന തീയിലേക്ക് എണ്ണയൊഴിക്കുന്നതിന് തുല്യമായിരിക്കുമെന്ന് ലോക കാലാവസ്ഥാ സംഘടന സെക്രട്ടറി ജനറൽ സെലസ്റ്റി സൗലോ വ്യക്തമാക്കി.
പസഫിക് സമുദ്ര ഉപരിതലത്തിലെ ജലത്തിന്റെ താപനിലയിലുണ്ടാകുന്ന അസാധാരണമായ വർദ്ധനവാണ് എൽനിനോ പ്രതിഭാസത്തിന് കാരണമാകുന്നത്. സാധാരണ നിലയിൽ പസഫിക് സമുദ്രത്തിൽ വീശുന്ന ശക്തമായ കാറ്റ് ചൂടുവെള്ളത്തെ ഏഷ്യയുടെയും ഓസ്ട്രേലിയയുടെയും ഭാഗങ്ങളിലേക്ക് തള്ളിവിടുകയും പകരം തെക്കേ അമേരിക്കൻ തീരങ്ങളിൽ അടിത്തട്ടിലുള്ള തണുത്ത ജലം മുകളിലേക്ക് ഉയരുകയും ചെയ്യാറുണ്ട്. എന്നാൽ എൽനിനോ സമയത്ത് ഈ കാറ്റിന്റെ വേഗത കുറയുകയോ പൂർണ്ണമായി നിലയ്ക്കുകയോ ചെയ്യുന്നതോടെ ചൂടുവെള്ളം പസഫിക് സമുദ്രത്തിന്റെ മധ്യഭാഗത്തും തെക്കേ അമേരിക്കൻ തീരങ്ങളിലും കെട്ടിക്കിടന്ന് ചൂടുപിടിക്കുന്നു. ഇത് ആഗോളതലത്തിലുള്ള വായുസഞ്ചാരത്തെയും മേഘരൂപീകരണത്തെയും ബാധിക്കുകയും ഭൂമിയുടെ ഒരു ഭാഗത്ത് അതിരൂക്ഷമായ വരൾച്ചയും മറുഭാഗത്ത് പെരുമഴയും പ്രളയവുമുണ്ടാക്കാൻ ഇടയാക്കുകയും ചെയ്യുന്നു.
ഈ വർഷത്തെ എൽനിനോ ചരിത്രത്തിലെ തന്നെ ഏറ്റവും ശക്തമായ ഒന്നായി മാറുമെന്നാണ് കാലാവസ്ഥാ വിദഗ്ധരുടെ വിലയിരുത്തൽ. കഴിഞ്ഞ 50 വർഷത്തിനിടെയുണ്ടായ ശക്തമായ എൽനിനോ പ്രതിഭാസങ്ങൾ ആഗോള താപനില 2 ഡിഗ്രി സെൽഷ്യസ് വരെ വർദ്ധിപ്പിച്ചിരുന്നെങ്കിൽ ഇത്തവണ അത് 3 ഡിഗ്രി സെൽഷ്യസ് വരെ ഉയർന്നേക്കാം. എൽനിനോ ശക്തമാകുന്നതോടെ ഇന്ത്യയിലും പ്രത്യേകിച്ച് കേരളത്തിലും കാലവർഷം കടുത്ത രീതിയിൽ ദുർബലമാകാൻ സാധ്യതയുണ്ട്. ഇത് സംസ്ഥാനത്ത് കടുത്ത വേനലിനും കുടിവെള്ള ക്ഷാമത്തിനും കൃഷിനാശത്തിനും വഴിതെളിച്ചേക്കാം. 1982, 1997, 2015, 2023 വർഷങ്ങളിൽ ലോകത്തിന്റെ വിവിധ ഭാഗങ്ങളിൽ വൻ പ്രളയങ്ങൾക്കും നദികൾ വറ്റിവരളുന്നതിനും കാരണമായ എൽനിനോയുടെ പുതിയ വരവിനെ അതീവ ജാഗ്രതയോടെ കാണണമെന്ന് വിദഗ്ധർ ഓർമ്മിപ്പിക്കുന്നു.
Summary: The United Nations’ World Meteorological Organization has issued an urgent climate warning regarding the impending El Nino phenomenon, which is expected to trigger extreme weather conditions globally. This severe climate pattern could significantly weaken the monsoon in India, posing a high risk of intense drought and water scarcity in states like Kerala. Experts warn that combined with ongoing global warming, this year’s El Nino could become one of the strongest in history, severely impacting agriculture and rising temperatures.
