മലപ്പുറം: ഒതുക്കുങ്ങലിൽ വീടിനുള്ളിൽ ഉറങ്ങിക്കിടക്കുകയായിരുന്ന അഞ്ച് മാസം പ്രായമുള്ള പിഞ്ചുകുഞ്ഞിനെ തെരുവ് നായ ക്രൂരമായി കടിച്ചു കീറി. ഒതുക്കുങ്ങൽ തൊടുവത്തുപറമ്പിൽ ഉച്ചയോടെയാണ് നാടിനെ നടുക്കിയ ദാരുണമായ സംഭവം ഉണ്ടായത്.(Stray Dog attack, Malappuram Five Month Old Baby Attacked By Stray Dog )
നായയുടെ ആക്രമണത്തിൽ ഗുരുതരമായി പരിക്കേറ്റ കുഞ്ഞിനെ ഉടൻ തന്നെ മഞ്ചേരി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. വീടിന്റെ മുൻവശത്തെ വാതിൽ തുറന്നുകിടന്ന സമയത്താണ് തെരുവ് നായ അകത്തുകയറിയത്. തുടർന്ന് മുറിയിൽ ഉറങ്ങുകയായിരുന്ന കുഞ്ഞിനെ കടിച്ചുകീറുകയായിരുന്നു.
കുട്ടിയുടെ ഉച്ചത്തിലുള്ള കരച്ചിൽ കേട്ട് വീട്ടുകാർ ഓടിയെത്തിയപ്പോഴാണ് ചോരയിൽ കുളിച്ച നിലയിൽ കുഞ്ഞിനെ കണ്ടത്. ഉടൻ തന്നെ വീട്ടുകാർ നായയെ അടിച്ചോടിക്കുകയായിരുന്നു. കുഞ്ഞിനെ കൂടാതെ പ്രദേശത്തെ മറ്റ് മൂന്ന് പേർക്കും ഇതേ തെരുവ് നായയുടെ കടിയേറ്റിട്ടുണ്ട്. ഇവർക്കും ആശുപത്രിയിൽ പ്രാഥമിക ചികിത്സ നൽകി. മേഖലയിൽ തെരുവ് നായ ശല്യം അതിരൂക്ഷമാണെന്ന് നാട്ടുകാർ ആരോപിക്കുന്നു.
Story Summary
A five-month-old infant was brutally attacked and injured by a stray dog inside a house in Othukkungal, Malappuram. The dog entered through an open door and attacked the sleeping baby, who has been rushed to Manjeri Medical College. The same stray dog also bit three other individuals in the locality, triggering intense protests from residents demanding immediate action against the stray dog menace.
