തിരുവനന്തപുരം: നിയമസഭാ തെരഞ്ഞെടുപ്പിന് മുന്നോടിയായി പ്രചാരണ പരിപാടികൾക്ക് ആവേശം പകരാൻ കോൺഗ്രസ് നേതാവ് രാഹുൽ ഗാന്ധി കേരളത്തിലെത്തുന്നു. രണ്ട് ഘട്ടങ്ങളിലായാണ് അദ്ദേഹം സംസ്ഥാനത്ത് സന്ദർശനം നടത്തുന്നത്. ആദ്യഘട്ടം ഫെബ്രുവരി 25, 26 തീയതികളിലും രണ്ടാംഘട്ടം മാർച്ച് ആറ്, ഏഴ് തീയതികളിലുമാണ് നിശ്ചയിച്ചിരിക്കുന്നത്.(Rahul Gandhi in Kerala today to invigorate Congress campaign)
ഫെബ്രുവരി 25-ന് കേരളത്തിലെത്തുന്ന രാഹുൽ ഗാന്ധി വിവിധ പരിപാടികളിൽ പങ്കാളിയാകും. 26-ന് കണ്ണൂരിൽ വെച്ച് കർഷകരുമായി അദ്ദേഹം നേരിട്ട് ആശയവിനിമയം നടത്തും. കാർഷിക മേഖലയിലെ പ്രതിസന്ധികൾ അദ്ദേഹം ചർച്ച ചെയ്യും.
വയനാട്ടിൽ കോൺഗ്രസ് നിർമ്മിച്ചു നൽകുന്ന വീടുകളുടെ ശിലാസ്ഥാപന കർമ്മം അദ്ദേഹം നിർവഹിക്കും. സീറ്റ് വിഭജനം ഉൾപ്പെടെയുള്ള രാഷ്ട്രീയ വിഷയങ്ങളിൽ യുഡിഎഫ് കക്ഷിനേതാക്കളുമായി അദ്ദേഹം കൂടിക്കാഴ്ച നടത്തും. മുന്നണിക്കുള്ളിലെ നിലവിലെ രാഷ്ട്രീയ സാഹചര്യങ്ങളും ചർച്ചയാകും. പ്രതിപക്ഷ നേതാവ് വി.ഡി. സതീശൻ നയിക്കുന്ന ‘പുതുയുഗയാത്ര’യുടെ സമാപന സമ്മേളനത്തിനായാണ് രാഹുൽ ഗാന്ധി രണ്ടാം ഘട്ടത്തിൽ എത്തുന്നത്. മാർച്ച് 6-ന് നടക്കുന്ന പുതുയുഗയാത്രയുടെ സമാപനത്തിൽ അദ്ദേഹം മുഖ്യാതിഥിയാകും.
