പന്തളം: കാറിനുള്ളിൽ പ്രത്യേക രഹസ്യ അറ നിർമ്മിച്ച് വൻതോതിൽ മാരക മയക്കുമരുന്നായ എം.ഡി.എം.എ. (MDMA) കടത്തിയ കേസിൽ ഒരു യുവതി കൂടി പോലീസ് പിടിയിൽ (Pandalam MDMA seizure). പന്തളം കടക്കാട് സ്വദേശി മുഹമ്മദ് ഷായുടെ ഭാര്യ ഷെബീന ഖാൻ (29) എന്ന യുവതിയെയാണ് പന്തളം പോലീസ് അറസ്റ്റ് ചെയ്തത്. ഈ ലഹരിക്കടത്ത് കേസിലെ മൂന്നാം പ്രതിയാണ് ഷെബീന.
കേസിലെ മറ്റ് പ്രതികൾക്ക് ബംഗളൂരുവിൽ നിന്നും തമിഴ്നാട്ടിൽ നിന്നും മയക്കുമരുന്ന് വാങ്ങുന്നതിനും മറ്റ് ലഹരി ഇടപാടുകൾക്കുമായി പണം അയച്ചു കൊടുത്തിരുന്നത് ഷെബീനയുടെ ബാങ്ക് അക്കൗണ്ടുകൾ വഴിയാണെന്ന് പോലീസ് അന്വേഷണത്തിൽ കണ്ടെത്തിയിരുന്നു. ലഹരി മാഫിയയുടെ പ്രധാന സാമ്പത്തിക സ്രോതസ്സായി പ്രവർത്തിച്ചിരുന്നത് ഈ യുവതിയാണെന്നാണ് പോലീസ് നൽകുന്ന സൂചന.
മേയ് 15-നാണ് പന്തളത്തെ നടുക്കിയ വൻ ലഹരിവേട്ട നടന്നത്. കാറിൽ കടത്തിക്കൊണ്ടുവന്ന 395.296 ഗ്രാം എം.ഡി.എം.എയുമായി അടൂർ പറക്കോട് സ്വദേശി ഷംനാദ്, കോട്ടമുകൾ സ്വദേശി മുഹമ്മദ് ഷാൻ എന്നിവരെ പൊലീസും ജില്ലാ ലഹരി വിരുദ്ധ സ്ക്വാഡും (DANSAF) ചേർന്ന് സാഹസികമായി പിടികൂടിയിരുന്നു.
പന്തളം വലിയപാലത്തിന് സമീപം വെച്ച് പ്രതികൾ സഞ്ചരിച്ച കാർ തടഞ്ഞുനിർത്തി പരിശോധിച്ചപ്പോഴാണ് പോലീസിനെപ്പോലും ഞെട്ടിച്ച രഹസ്യ അറ കണ്ടെത്തിയത്. കാറിന്റെ ഡീസൽ ടാങ്കിന് മുകളിലായി നിർമ്മിച്ച പ്രത്യേക രഹസ്യ അറയ്ക്കുള്ളിലെ പ്ലാസ്റ്റിക് ബോട്ടിലിൽ ഒളിപ്പിച്ച നിലയിലായിരുന്നു എം.ഡി.എം.എ. ഈ ബോട്ടിൽ കട്ട് ചെയ്താണ് പോലീസ് ലഹരിവസ്തു പുറത്തെടുത്തത്.
തമിഴ്നാട്ടിലെ ഈറോഡിൽ നിന്നാണ് പ്രതികൾ ഈ മയക്കുമരുന്ന് വലിയ തുകയ്ക്ക് വാങ്ങിയതെന്ന് ചോദ്യം ചെയ്യലിൽ വ്യക്തമായിട്ടുണ്ട്. ഇത് നാട്ടിലെത്തിച്ച് ചില്ലറ വിൽപ്പനക്കാർക്ക് ചെറിയ പാക്കറ്റുകളാക്കി നൽകി ലക്ഷങ്ങളുടെ ലാഭമുണ്ടാക്കുകയായിരുന്നു ഇവരുടെ ലക്ഷ്യം.
പിടിയിലായ പ്രതികളിൽ ഷംനാദ് മുൻപ് കാപ്പാ (KAAPA) നിയമപ്രകാരം നാടുകടത്തപ്പെട്ട കുപ്രസിദ്ധ കുറ്റവാളിയാണ്. കേസിൽ സാമ്പത്തിക ഇടപാടുകൾ നടത്തിയ യുവതി കൂടി അറസ്റ്റിലായതോടെ ലഹരി മാഫിയയുടെ ബാങ്ക് അക്കൗണ്ടുകളെക്കുറിച്ചും ഇതിന് പിന്നിൽ പ്രവർത്തിച്ച വൻ സ്രാവുകളെക്കുറിച്ചും വ്യക്തമായ സൂചനകൾ ലഭിക്കുമെന്ന വിലയിരുത്തലിലാണ് പോലീസ് അന്വേഷണ സംഘം.
Story Summary (English): The Pandalam police have arrested a 29-year-old woman, Shabina Khan, in connection with the seizure of 395.296 grams of MDMA smuggled in a secret compartment of a car. Shabina, named the third accused, is allegedly the financial brain behind the racket, using her bank account to fund drug purchases for the other suspects. On May 15, police and DANSAF operatives intercepted the car near Pandalam bridge and recovered the drugs hidden inside a modified fuel tank. The contraband was sourced from Erode, Tamil Nadu, for local retail distribution. One of the co-accused, Shamnad, is a habitual offender previously booked under the KAAPA Act.
