തിരുവനന്തപുരം: സമൂഹമാധ്യമങ്ങളിലൂടെ തനിക്കെതിരെ വസ്തുതാവിരുദ്ധവും അപകീർത്തികരവുമായ പരാമർശങ്ങൾ നടത്തിയെന്നാരോപിച്ച് ബിജെപി നേതാവും സംവിധായകനുമായ മേജർ രവിക്കെതിരെ സംസ്ഥാന ആഭ്യന്തര മന്ത്രിക്കും പോലീസ് മേധാവിക്കും (DGP) രേഖാമൂലം പരാതി നൽകി പ്രതിപക്ഷ നേതാവ് പിണറായി വിജയൻ (Pinarayi Vijayan complaint Major Ravi). മുൻപ് അന്തരിച്ച പ്രശസ്ത ചലച്ചിത്ര നടൻ ഇന്നസെന്റിന് അന്ത്യോപചാരം അർപ്പിക്കാൻ താൻ എത്തിയ സംഭവത്തെ മുൻനിർത്തി മേജർ രവി നടത്തിയ പ്രസ്താവനയ്ക്കെതിരെയാണ് പ്രതിപക്ഷ നേതാവിന്റെ നിയമനടപടി.
മുൻ മുഖ്യമന്ത്രി കൂടിയായ താൻ അന്ന് 56 ഔദ്യോഗിക കാറുകളുടെയും, 560 പോലീസുകാരുടെയും, 10 ഫയർ എഞ്ചിനുകളുടെയും വൻ അകമ്പടിയോടെയാണ് ഇന്നസെന്റിന് ആദരാഞ്ജലി അർപ്പിക്കാൻ എത്തിയത് എന്നായിരുന്നു മേജർ രവിയുടെ വിവാദ പരാമർശം. നിലവിലെ മുഖ്യമന്ത്രി വി.ഡി. സതീശൻ പൊതുപരിപാടികളിൽ പങ്കെടുക്കാൻ എത്തുന്നതുമായി താരതമ്യപ്പെടുത്തിയായിരുന്നു മേജർ രവിയുടെ ഈ ആരോപണം. ഇതിന് പിന്നാലെ നിരവധി നവമാധ്യമ ഹാൻഡിലുകൾ എഡിറ്റ് ചെയ്ത ദൃശ്യങ്ങൾ ഉപയോഗിച്ച് കൃത്രിമമായി പോസ്റ്റുകൾ നിർമ്മിച്ച് സൈബർ ഇടങ്ങളിൽ വ്യാപകമായി പ്രചരിപ്പിച്ചിരുന്നു.
ഈ പശ്ചാത്തലത്തിലാണ് ദൃശ്യങ്ങൾ സഹിതം പിണറായി വിജയൻ നേരിട്ട് പോലീസിൽ പരാതി നൽകിയത്. സംഭവ ദിവസത്തെ യഥാർത്ഥ മാധ്യമ ദൃശ്യങ്ങളും ഡിജിറ്റലായി കൃത്രിമം നടത്തി പ്രചരിപ്പിച്ച വ്യാജ പോസ്റ്റുകളുടെ ലിങ്കുകളും പരാതിയോടൊപ്പം തെളിവായി ഹാജരാക്കിയിട്ടുണ്ട്. പൊതുസമൂഹത്തിൽ തന്നെ മനഃപൂർവ്വം അപകീർത്തിപ്പെടുത്താനും രാഷ്ട്രീയമായി വേട്ടയാടാനും ലക്ഷ്യമിട്ട് നടത്തിയ ഈ വ്യാജ പ്രചാരണത്തിന് പിന്നിൽ കൃത്യമായ ഗൂഢാലോചനയുണ്ടെന്നും, സൈബർ പോലീസിന്റെ സഹായത്തോടെ ശാസ്ത്രീയമായി അന്വേഷിച്ച് കുറ്റവാളികൾക്കെതിരെ കർശന ശിക്ഷാ നടപടികൾ ഉറപ്പാക്കണമെന്നും പ്രതിപക്ഷ നേതാവ് പരാതിയിൽ ആവശ്യപ്പെട്ടു.
Story Summary: Leader of the Opposition Pinarayi Vijayan has filed an official complaint with the Home Minister and the DGP against BJP leader Major Ravi over his controversial social media remarks. Major Ravi alleged that the former CM arrived with a massive convoy of 56 cars and 560 police personnel to pay last respects to late actor Innocent, drawing comparisons to current CM V.D. Satheesan. The complaint demands a detailed cyber investigation into the fake videos and political conspiracy behind the campaign.
