തിരുവനന്തപുരം: അടിസ്ഥാന ശമ്പളം വർദ്ധിപ്പിക്കണമെന്നാവശ്യപ്പെട്ട് സംസ്ഥാനത്തെ സ്വകാര്യ ആശുപത്രികളിലെ നേഴ്സുമാർ പണിമുടക്കിലേക്ക്. ഫെബ്രുവരി 21-ന് സംസ്ഥാനത്തെ 476 സ്വകാര്യ ആശുപത്രികളിൽ പണിമുടക്ക് നടത്തുമെന്ന് യുണൈറ്റഡ് നേഴ്സസ് അസോസിയേഷൻ ഭാരവാഹികൾ വാർത്താസമ്മേളനത്തിൽ അറിയിച്ചു.(Nurses to strike on February 21, Demand increase in basic salary)
അടിസ്ഥാന ശമ്പളം 40,000 രൂപയാക്കി വർദ്ധിപ്പിക്കണമെന്നാണ് പ്രധാന ആവശ്യം. കഴിഞ്ഞ ഏഴ് വർഷമായി ശമ്പളത്തിൽ കാര്യമായ വർദ്ധനവ് ഉണ്ടായിട്ടില്ലെന്ന് സംഘടന ആരോപിക്കുന്നു. ശമ്പളം വർദ്ധിപ്പിക്കുന്ന കാര്യത്തിൽ സർക്കാർ ഉത്തരവിറക്കാൻ തയ്യാറാകുന്നില്ലെന്നും, പകരം സംഘടനയുടെ ഭാരവാഹികളെ കള്ളക്കേസിൽ കുടുക്കി വേട്ടയാടുകയാണെന്നും യുഎൻഎ കുറ്റപ്പെടുത്തി.
നേഴ്സുമാരുടെ ജീവിതസാഹചര്യങ്ങൾ മെച്ചപ്പെടുത്താൻ അധികൃതർ തയ്യാറാകാത്തതിനാലാണ് ഈ തീരുമാനം. ഫെബ്രുവരി 21-ലെ പണിമുടക്ക് ആരോഗ്യമേഖലയെ സാരമായി ബാധിച്ചേക്കും.
