തിരുവനന്തപുരം: സംസ്ഥാനത്തെ പൊതുആരോഗ്യ സംവിധാനത്തെ ദുർബലപ്പെടുത്തി സ്വകാര്യ കോർപറേറ്റ് ആശുപത്രികൾക്ക് അനുകൂല സാഹചര്യം സൃഷ്ടിക്കുന്ന നയമാണ് യുഡിഎഫ് സർക്കാർ സ്വീകരിക്കുന്നതെന്ന് സിപിഐ എം സംസ്ഥാന സെക്രട്ടറി എം.വി. ഗോവിന്ദൻ ആരോപിച്ചു (M V Govindan). തിരുവനന്തപുരം നടത്തിയ വാർത്താസമ്മേളനത്തിലാണ് അദ്ദേഹം സർക്കാരിനെതിരെ രൂക്ഷ വിമർശനം ഉന്നയിച്ചത്.
കേരളത്തിന്റെ പൊതുആരോഗ്യ രംഗം രാജ്യത്തിന് മാതൃകയായ നേട്ടങ്ങൾ കൈവരിച്ചതിന് പിന്നിൽ ശക്തമായ സർക്കാർ ആരോഗ്യ സംവിധാനമാണെന്ന് അദ്ദേഹം പറഞ്ഞു. എന്നാൽ നിലവിലെ സാഹചര്യത്തിൽ സർക്കാർ ആശുപത്രികളിലെത്തുന്ന എല്ലാ രോഗികൾക്കും ചികിത്സ നൽകാനാകില്ലെന്ന ആരോഗ്യമന്ത്രിയുടെ നിലപാട് പൊതുആരോഗ്യ മേഖലയെ ദുർബലപ്പെടുത്തുന്നതും സ്വകാര്യ ആശുപത്രികൾക്ക് പ്രയോജനം ചെയ്യുന്ന തരത്തിലുമാണെന്ന് എം.വി. ഗോവിന്ദൻ ആരോപിച്ചു.
ആർദ്രം പദ്ധതിയിലൂടെ സർക്കാർ ആശുപത്രികളിൽ സമഗ്ര ചികിത്സാ സേവനങ്ങൾ ലഭ്യമാക്കുകയെന്ന ലക്ഷ്യമാണ് മുൻ എൽഡിഎഫ് സർക്കാർ മുന്നോട്ടുവെച്ചതെന്ന് അദ്ദേഹം ചൂണ്ടിക്കാട്ടി. അവയവമാറ്റ ശസ്ത്രക്രിയകൾ ഉൾപ്പെടെയുള്ള അത്യാധുനിക ചികിത്സകൾ സർക്കാർ മേഖലയിലേക്ക് വ്യാപിപ്പിക്കുന്നതിനും പ്രത്യേക ആശുപത്രികൾ ആരംഭിക്കുന്നതിനുമുള്ള നടപടികൾ സ്വീകരിച്ചിരുന്നുവെന്നും അദ്ദേഹം പറഞ്ഞു. ഇതിന് വിരുദ്ധമായ സമീപനമാണ് നിലവിലെ സർക്കാർ സ്വീകരിക്കുന്നതെന്നും അദ്ദേഹം ആരോപിച്ചു.
യുഡിഎഫ് സർക്കാർ അധികാരത്തിലെത്തിയതിന് ശേഷം ചികിത്സയിലെ അനാസ്ഥയും ആരോഗ്യ സ്ഥാപനങ്ങളിലെ അടിസ്ഥാന സൗകര്യങ്ങളുടെ കുറവും മൂലം നിരവധി ദുരന്തങ്ങൾ ഉണ്ടായതായി എം.വി. ഗോവിന്ദൻ ആരോപിച്ചു. വൈദ്യുതി മുടങ്ങിയ സാഹചര്യത്തിൽ മൊബൈൽ ഫോണിന്റെ വെളിച്ചത്തിൽ ശസ്ത്രക്രിയ നടത്തേണ്ടി വന്ന സംഭവങ്ങൾ വരെ ഉണ്ടായിട്ടുണ്ടെന്നും ആരോഗ്യ മേഖലയിലെ ഇത്തരം പ്രശ്നങ്ങൾ പരിഹരിക്കാൻ സർക്കാർ അടിയന്തര നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.
Story Summary:
CPI(M) State Secretary M.V. Govindan accused the UDF government of weakening Kerala’s public healthcare system to benefit corporate hospitals. He also alleged that the government’s policies have adversely affected healthcare services across the state.
