വയനാട്: ചൂരൽമല ഉരുൾപൊട്ടൽ ദുരന്തത്തിൽ വീട് നഷ്ടപ്പെട്ടവർക്കായി മുസ്ലിം ലീഗ് നിർമ്മിച്ച ആദ്യഘട്ട വീടുകൾ നാളെ കൈമാറും. തൃക്കെപ്പറ്റയിൽ നിർമ്മിച്ച മിനി ടൗൺഷിപ്പിലെ 51 വീടുകളിലാണ് കുടുംബങ്ങൾ നാളെ താമസം ആരംഭിക്കുന്നത്.(Muslim League extends support to Wayanad disaster victims, Housewarming ceremony for 51 houses tomorrow)
ദുരന്തബാധിതരുടെ പുനരധിവാസം ലക്ഷ്യമിട്ട് മികച്ച സൗകര്യങ്ങളാണ് മുസ്ലിം ലീഗ് ഒരുക്കിയിരിക്കുന്നത്. 8 സെന്റ് ഭൂമിയിൽ 1060 ചതുരശ്രയടി വിസ്തീർണ്ണത്തിലാണ് ഓരോ വീടും നിർമ്മിച്ചിരിക്കുന്നത്. മൂന്ന് ബെഡ്റൂമുകൾ ഉൾപ്പെടെയുള്ള സൗകര്യങ്ങൾ ഓരോ വീടുകളിലുമുണ്ട്.
പാണക്കാട് സയ്യിദ് സാദിഖ് അലി ശിഹാബ് തങ്ങൾ ഉൾപ്പെടെയുള്ള പ്രമുഖ ലീഗ് നേതാക്കൾ നാളത്തെ ഗൃഹപ്രവേശന ചടങ്ങിൽ സംബന്ധിക്കും. കുടുംബങ്ങളുടെ സ്വകാര്യതയ്ക്കും സമാധാനപരമായ താമസത്തിനും മുൻഗണന നൽകിക്കൊണ്ട് ലീഗ് നേതൃത്വം പ്രവർത്തകർക്ക് കർശന നിർദ്ദേശം നൽകിയിട്ടുണ്ട്. ചടങ്ങിനോടനുബന്ധിച്ച് മിനി ടൗൺഷിപ്പിലേക്ക് പ്രവർത്തകർ ഉൾപ്പെടെയുള്ളവർ അനാവശ്യ സന്ദർശനം ഒഴിവാക്കണമെന്ന് നേതൃത്വം അഭ്യർത്ഥിച്ചു.
