കൊച്ചി: മലയിടംതുരുത്തിൽ സുപ്രീംകോടതി ഉത്തരവിനെത്തുടർന്ന് ദളിത് കുടുംബങ്ങളെ കുടിയൊഴിപ്പിക്കാൻ ശ്രമിച്ചതും തുടർന്നുണ്ടായ പൊലീസ് അതിക്രമവും രാഷ്ട്രീയ ആയുധമാക്കാൻ സി.പി.എം. പൊലീസ് നടപടിക്കെതിരെ പി. രാജീവ് ഉൾപ്പെടെയുള്ള പ്രമുഖ നേതാക്കൾ പങ്കെടുക്കുന്ന പ്രതിഷേധ പരിപാടി ഇന്ന് മലയിടംതുരുത്തിൽ നടക്കും. അതേസമയം, എന്തുകൊണ്ട് ലാത്തിച്ചാർജ് ഉൾപ്പെടെയുള്ള പൊലീസ് നടപടിയുണ്ടായെന്ന കാര്യത്തിൽ ആലുവ റൂറൽ എസ്.പി ഇന്ന് എറണാകുളം റേഞ്ച് ഐ.ജിക്ക് വിശദമായ റിപ്പോർട്ട് നൽകും.(Malayidomthuruth Eviction, CPM To Protest Police Action On Ernakulam Malayidomthuruth Dalit Families Eviction Row)
അതിനിടെ, മലയിടംതുരുത്തിലെ കുടിയൊഴിപ്പിക്കൽ പ്രതിഷേധവുമായി ബന്ധപ്പെട്ട് സി.പി.എം നേതാക്കൾക്കും പ്രദേശവാസികളായ ദളിത് കുടുംബാംഗങ്ങൾക്കും എതിരെ പൊലീസ് കേസെടുത്തു. അമ്പതോളം പേർക്കെതിരെയാണ് തടിയിട്ടപറമ്പ് പൊലീസ് കേസ് രജിസ്റ്റർ ചെയ്തിരിക്കുന്നത്. അന്യായമായി സംഘം ചേരൽ, ഔദ്യോഗിക കൃത്യനിർവഹണം തടസ്സപ്പെടുത്തൽ തുടങ്ങിയ വകുപ്പുകൾ ചുമത്തിയാണ് നടപടി. സ്ത്രീകളും കുട്ടികളും അടക്കമുള്ളവർ പ്രതിഷേധവുമായി രംഗത്തിറങ്ങിയതോടെ ഇന്നലെ ആഭ്യന്തര മന്ത്രി രമേശ് ചെന്നിത്തലയുടെ അടിയന്തര ഇടപെടലിനെ തുടർന്ന് ഒഴിപ്പിക്കൽ നടപടികൾ താൽക്കാലികമായി നിർത്തിവെച്ചിരുന്നു. ഇതിന് പിന്നാലെയാണ് ഇപ്പോൾ പൊലീസ് കേസെടുത്തിരിക്കുന്നത്.
ഭൂമിയുടെ ഉടമസ്ഥതയെച്ചൊല്ലി സ്വകാര്യ വ്യക്തിയും ദളിത് കുടുംബങ്ങളും തമ്മിൽ തുടരുന്ന തർക്കമാണിത്. സുപ്രീംകോടതി നിർദ്ദേശപ്രകാരം ഇവിടെയുള്ള ഏഴ് പട്ടികജാതി കുടുംബങ്ങളെ കുടിയൊഴിപ്പിക്കാൻ അഡ്വക്കേറ്റ് കമ്മീഷൻ്റെ നേതൃത്വത്തിൽ ഉദ്യോഗസ്ഥർ എത്തിയതോടെയാണ് സംഘർഷം ആരംഭിച്ചത്. കോടതി ഉത്തരവ് നടപ്പാക്കാനുള്ള പതിനഞ്ചാമത്തെ ശ്രമമായിരുന്നു ഇത്. എന്നാൽ നാട്ടുകാർ സംഘടിച്ച് ശക്തമായി തടഞ്ഞതോടെ ഉദ്യോഗസ്ഥർക്ക് മുന്നോട്ട് പോകാനായില്ല.
Story Summary
A major political controversy has erupted in Malayidomthuruth, Ernakulam, following a violent police clash during an eviction drive against seven Dalit families based on a Supreme Court order. While the CPM is launching a massive protest today led by leader P Rajeev, the police have registered a case against 50 people, including local politicians and residents, even as Home Minister Ramesh Chennithala ordered a temporary halt to the eviction.
