റിപ്പോർട്ട് : അൻവർ ഷരീഫ്
കൊണ്ടോട്ടി: മലപ്പുറം ജില്ലയിൽ ലഹരിസംഘങ്ങൾക്കെതിരെ പോലീസ് നടത്തുന്ന ‘ഓപ്പറേഷൻ തൂഫാന്റെ’ (Operation toofan malappuram) ഭാഗമായി കൊണ്ടോട്ടിയിൽ എംഡിഎംഎ (MDMA) പിടികൂടിയ കേസിൽ ഒരാൾ കൂടി അറസ്റ്റിൽ. പെരിന്തൽമണ്ണ ചെമ്മലശ്ശേരി സ്വദേശി മല്ലിറ്റിയിൽ വീട്ടിൽ ഹൈദ്രാലിയെ (23) ആണ് പോലീസ് പിടികൂടിയത്. ഇന്നലെ വൈകിട്ടോടെ ചെമ്മലശ്ശേരിയിൽ വെച്ചാണ് ഇയാൾ വലയിലായത്.
കൊണ്ടോട്ടി കാഞ്ഞിരംപറമ്പ് സ്വദേശിയായ അഷ്ഫാക്കിന്റെ വീട്ടിൽ നടത്തിയ പരിശോധനയിൽ 16 ഗ്രാം എംഡിഎംഎ പിടികൂടിയിരുന്നു. ഈ കേസിലെ അന്വേഷണമാണ് ഇപ്പോൾ ഹൈദ്രാലിയിലേക്ക് എത്തിയത്. ഇതിനിടെ, കോട്ടക്കൽ പോലീസ് സ്റ്റേഷൻ പരിധിയിൽ 77 ഗ്രാം എംഡിഎംഎയുമായി പിടിയിലായ പുലാമന്തോൾ സ്വദേശി ഷമീറിന്റെ കേസുമായി ബന്ധപ്പെട്ട് അഷ്ഫാക്കിന്റെ അറസ്റ്റും പോലീസ് ഇന്നലെ രേഖപ്പെടുത്തിയിട്ടുണ്ട്.
അറസ്റ്റിലായ ഹൈദ്രാലിയെ വിശദമായി ചോദ്യം ചെയ്തതിൽ നിന്ന് ജില്ലയിലെ ലഹരി കടത്ത് ശൃംഖലയിലെ മറ്റ് പ്രധാന കണ്ണികളെക്കുറിച്ച് പോലീസിന് വ്യക്തമായ സൂചന ലഭിച്ചിട്ടുണ്ട്. മലപ്പുറം ജില്ലാ പോലീസ് മേധാവി ചൈത്ര തെരേസ ജോൺ ഐപിഎസിന് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന. കൊണ്ടോട്ടി എഎസ്പി കാർത്തിക് ബാലകുമാർ ഐപിഎസ്, ഇൻസ്പെക്ടർ അനുദാസ് എന്നിവരുടെ നേതൃത്വത്തിലുള്ള ഡാൻസാഫ് (DANSAF) ടീമാണ് പ്രതികളെ പിടികൂടി അന്വേഷണം വ്യാപിപ്പിക്കുന്നത്.
Story Summary:
Under ‘Operation Toofan’, the Malappuram DANSAF team has arrested another youth, Hydrali (23) from Perinthalmanna, in connection with the seizure of 16 grams of MDMA in Kondotty. The interrogation of the accused has provided the police with crucial leads regarding the wider drug trafficking network in the district.
