തിരുവനന്തപുരം: സംസ്ഥാനത്ത് കനത്ത മഴയും ദുരിതവും തുടരുന്ന സാഹചര്യത്തിൽ കരുതൽ നടപടിയായി ഓഗസ്റ്റ് 4 (Kerala rain holiday August 4 2026) ചൊവ്വാഴ്ച വിവിധ ജില്ലകളിൽ വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചു. കോഴിക്കോട്, മലപ്പുറം, പത്തനംതിട്ട, ആലപ്പുഴ എന്നീ നാല് ജില്ലകളിലെ മുഴുവൻ വിദ്യാഭ്യാസ സ്ഥാപനങ്ങൾക്കും നാളെ അവധിയായിരിക്കും.
അതേസമയം കണ്ണൂർ, ഇടുക്കി, വയനാട് ജില്ലകളിൽ ഭാഗികമായി മാത്രമാണ് അവധി പ്രഖ്യാപിച്ചിരിക്കുന്നത്.
വിവിധ ജില്ലകളിലെ അവധി വിവരങ്ങൾ ചുരുക്കത്തിൽ:
കോഴിക്കോട്, മലപ്പുറം, പത്തനംതിട്ട, ആലപ്പുഴ: ജില്ലകളിലെ പ്രൊഫഷണൽ കോളേജുകൾ, അങ്കണവാടികൾ, ട്യൂഷൻ സെന്ററുകൾ, മദ്രസകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും നാളെ അവധിയായിരിക്കും. പത്തനംതിട്ടയിലും മലപ്പുറത്തും മുൻകൂട്ടി നിശ്ചയിച്ച യൂണിവേഴ്സിറ്റി/പൊതു പരീക്ഷകൾക്ക് മാറ്റമില്ല. കോഴിക്കോട് ജില്ലയിൽ ഓഫ്ലൈൻ ക്ലാസുകൾക്കാണ് അവധിയെന്നും ഓൺലൈൻ ക്ലാസുകൾ നടത്തുന്നതിന് തടസ്സമില്ലെന്നും കളക്ടർ വ്യക്തമാക്കി.
കണ്ണൂർ: പയ്യന്നൂർ, തളിപ്പറമ്പ്, ഇരിട്ടി താലൂക്കുകളിലെ വിദ്യാഭ്യാസ സ്ഥാപനങ്ങൾക്ക് നാളെ അവധിയാണ്. എന്നാൽ ഈ താലൂക്കുകളിൽ പ്രൊഫഷണൽ കോളേജുകൾക്കും റസിഡൻഷ്യൽ സ്കൂളുകൾക്കും അവധി ബാധകമല്ല (ദുരിതാശ്വാസ ക്യാമ്പുകളായി പ്രവർത്തിക്കുന്ന പ്രൊഫഷണൽ കോളേജുകൾക്ക് അവധിയായിരിക്കും). പൊതുപരീക്ഷകൾക്കും അഭിമുഖങ്ങൾക്കും മാറ്റമുണ്ടാകില്ല.
ഇടുക്കി & വയനാട്: ഇടുക്കിയിൽ ദുരിതാശ്വാസ ക്യാമ്പുകളായി പ്രവർത്തിക്കുന്ന വിദ്യാഭ്യാസ സ്ഥാപനങ്ങൾക്ക് ക്യാമ്പ് അവസാനിക്കുന്നത് വരെ അവധിയായിരിക്കും. നഷ്ടപ്പെടുന്ന പഠന സമയം ഓൺലൈൻ ക്ലാസുകളിലൂടെ ക്രമീകരിക്കാൻ നിർദേശമുണ്ട്. വയനാട് ജില്ലയിലും ദുരിതാശ്വാസ ക്യാമ്പുകൾ പ്രവർത്തിക്കുന്ന സ്കൂളുകൾക്ക് മാത്രമായിരിക്കും നാളെ അവധി.
അതേസമയം, അടുത്ത മൂന്ന് മണിക്കൂറിൽ ആലപ്പുഴ, ഇടുക്കി, കൊല്ലം, കോട്ടയം, പത്തനംതിട്ട ജില്ലകളിൽ ഇടിമിന്നലോട് കൂടിയ ശക്തമായ മഴയ്ക്കും മണിക്കൂറിൽ 50 കിലോമീറ്റർ വരെ വേഗതയുള്ള കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. ഈ ജില്ലകളിൽ ഓറഞ്ച് അലർട്ടും പ്രഖ്യാപിച്ചിട്ടുണ്ട്.
Story Summary: Due to heavy rainfall and flood relief operations, a holiday has been declared for educational institutions in Kozhikode, Malappuram, Pathanamthitta, and Alappuzha districts on Tuesday, August 4. Partial holidays have been announced in Kannur (Payyannur, Taliparamba, and Iritty taluks) and for schools functioning as relief camps in Idukki and Wayanad.
