ഫുട്ബോൾ ഇതിഹാസം ഐ.എം. വിജയനെതിരെ സോഷ്യൽ മീഡിയയിൽ രൂക്ഷമായ ജാതി അധിക്ഷേപം. മകൻ ആരോമലിന്റെ വിവാഹ ചടങ്ങിൽ നിന്നുള്ള ഒരു വീഡിയോ ദൃശ്യത്തിന് താഴെയാണ് വംശീയവും ജാതീയവുമായ അധിക്ഷേപ കമന്റുകൾ നിറയുന്നത്. വിവാഹ ചടങ്ങിൽ നിലവിളക്കിന് മുമ്പിൽ ചെരുപ്പ് ധരിച്ചു നിൽക്കുന്നുവെന്നാരോപിച്ചാണ് ഒരു വിഭാഗം ആളുകൾ അദ്ദേഹത്തെ വ്യക്തിപരമായി അധിക്ഷേപിക്കുന്നത്. (IM Vijayan Social Media Abuse)
ഒരു ഓൺലൈൻ ചാനൽ പങ്കുവെച്ച വീഡിയോയ്ക്ക് താഴെ ‘എത്ര സമ്പാദിച്ചാലും ആ പഴയ കോളനി സ്വഭാവം മാറില്ല’, ‘തേങ്ങ പത്തരച്ചാലും താളല്ലേ കറി’, ‘ഇവനൊക്കെ അറിവ് കൂടിപ്പോയതുകൊണ്ടാണ്’ എന്നിങ്ങനെ മനുഷ്യത്വരഹിതമായ കമന്റുകളാണ് ഉയരുന്നത്. വിജയന്റെ നിറത്തെയും സാമൂഹിക പശ്ചാത്തലത്തെയും അധിക്ഷേപിക്കുന്ന തരത്തിലുള്ള പരാമർശങ്ങളും ഇതിലുൾപ്പെടുന്നു. അതേസമയം, ഐ.എം. വിജയനെ പിന്തുണച്ച് നിരവധി പേർ രംഗത്തെത്തിയിട്ടുണ്ട്. അദ്ദേഹം പഴങ്ങൾ എടുക്കാൻ കുനിയുന്ന ദൃശ്യം തെറ്റിദ്ധാരണാജനകമായി ചിത്രീകരിക്കുകയായിരുന്നുവെന്നും, ക്യാമറ ആംഗിളിലെ മാറ്റമാണ് ആളുകൾ അധിക്ഷേപത്തിന് ഉപയോഗിക്കുന്നതെന്നും ആരാധകർ ചൂണ്ടിക്കാട്ടുന്നു. ജൂലൈ അഞ്ചിനായിരുന്നു ഐ.എം. വിജയന്റെ മകൻ ആരോമലിന്റെയും റോമി വിക്ടോറിയ ഹെബറിന്റെയും വിവാഹം. പ്രമുഖ താരങ്ങൾ പങ്കെടുത്ത ആഘോഷപരിപാടികൾക്കിടയിലാണ് ഇത്തരമൊരു വിവാദം ഉണ്ടായതെന്നത് കായിക ലോകത്തെയും ആരാധകരെയും ഞെട്ടിച്ചിരിക്കുകയാണ്.
Summary: Football legend I.M. Vijayan has been subjected to severe casteist and racist abuse on social media following a video from his son Aromal’s recent wedding. Trolls targeted the sports icon with derogatory comments regarding his background and appearance, claiming he showed disrespect near a traditional lamp, though supporters argue the footage was misinterpreted due to camera angles.
