വീട്ടമ്മയെ ആക്രമിച്ച കേസ്; അയൽവാസിയായ സ്ത്രീ അറസ്റ്റിൽ
Updated: Mar 18, 2023, 13:30 IST
ശാസ്താംകോട്ട: വീട്ടിലേക്കുള്ള വഴിയുമായി ബന്ധപ്പെട്ട തർക്കത്തിൽ വീട്ടമ്മയെ അയൽവാസിയായ സ്ത്രീ ആക്രമിച്ച് പരിക്കേൽപിച്ചതായി പരാതി. പോരുവഴി സ്വദേശി സുരേഷ് കുമാറിന്റെ ഭാര്യ ഗീതാകുമാരി(44)യാണ് ആക്രമണത്തിനിരയായത്. സംഭവത്തിൽ ശൂരനാട് പോലീസ് അറസ്റ്റ് ചെയ്ത ശാസ്താംനട കിഴക്കേടത്ത് വീട്ടിൽ ലളിത(52)യെ കോടതിയിൽ ഹാജരാക്കി റിമാൻഡ് ചെയ്തു. കഴിഞ്ഞദിവസം പകൽ 11.30ഓടെ ആയിരുന്നു സംഭവം നടന്നത്. കല്ല് ഉപയോഗിച്ചുള്ള ആക്രമണത്തിൽ കൈക്കും തലക്കും പൊട്ടലേറ്റ ഇവരെ ശാസ്താംകോട്ട താലൂക്കാശുപത്രിയിൽ പ്രവേശിപ്പിച്ചു. കഴിഞ്ഞ കുറെ കാലമായി ഇരുവീട്ടുകാരും തമ്മിൽ വഴിതർക്കം നിലനിന്നിരുന്നു. കഴിഞ്ഞയാഴ്ച ഗീതാകുമാരിയുടെ ഭർതൃ മാതാവിനെയും ലളിത കമ്പി ചൂൽ ഉപയോഗിച്ച് ആക്രമിച്ച് പരിക്കേൽപിച്ചിരുന്നു. ഈ സംഭവത്തിലും ശൂരനാട് പോലീസ് കേസെടുത്തിരുന്നു. അതിനിടെ ലളിത നൽകിയ പരാതിയിൽ ഗീതാകുമാരിക്കെതിരെയും കേസെടുത്തതായി പോലീസ് അറിയിച്ചു.