കൊച്ചി: കരിമണൽ കമ്പനിയായ സി.എം.ആർ.എല്ലുമായി ബന്ധപ്പെട്ട സാമ്പത്തിക ഇടപാടുകളിൽ എൻഫോഴ്സ്മെന്റ് ഡയറക്ടറേറ്റ് (ഇ.ഡി) നടത്തുന്ന അന്വേഷണം തടയണമെന്ന് ആവശ്യപ്പെട്ട് കമ്പനി നൽകിയ അപ്പീൽ ഹർജി ഹൈക്കോടതി ഇന്ന് പരിഗണിക്കും (High Court CMRL Appeal Against ED Investigation). ജസ്റ്റിസുമാരായ രാജ വിജയരാഘവൻ, കെ.വി. ജയകുമാർ എന്നിവരടങ്ങുന്ന ഡിവിഷൻ ബെഞ്ചാണ് കേസിൽ വാദം കേൾക്കുന്നത്. ഇ.ഡി അന്വേഷണവുമായി മുന്നോട്ടുപോകാമെന്ന സിംഗിൾ ബെഞ്ചിന്റെ ഉത്തരവ് അടിയന്തരമായി സ്റ്റേ ചെയ്യണമെന്നാണ് സി.എം.ആർ.എല്ലിന്റെ പ്രധാന ആവശ്യം. തങ്ങൾക്ക് നീതിനിഷേധം ഉണ്ടായെന്നും, സിംഗിൾ ബെഞ്ച് ഉത്തരവിലെ കണ്ടെത്തലുകൾ നിയമപരമായി നിലനിൽക്കില്ലെന്നുമാണ് കമ്പനിയുടെ വാദം. കോടതിയിലെ ഏഴാം നമ്പർ ഹാളിൽ അഞ്ചാമത്തെ കേസായിട്ടായിരിക്കും ഈ അപ്പീൽ ഇന്ന് കോടതിയുടെ പരിഗണനയ്ക്ക് വരിക.
അതേസമയം, കമ്പനിയുടെ ഈ നീക്കത്തെ കോടതിയിൽ അതിശക്തമായി എതിർക്കാനാണ് എൻഫോഴ്സ്മെന്റ് ഡയറക്ടറേറ്റിന്റെ തീരുമാനം. ഇ.ഡിയ്ക്ക് വേണ്ടി അഡീഷണൽ സോളിസിറ്റർ ജനറൽ തന്നെ ഇന്ന് കോടതിയിൽ ഹാജരാകും. കഴിഞ്ഞ ദിവസങ്ങളിൽ സംസ്ഥാനത്തെ വിവിധയിടങ്ങളിൽ നടത്തിയ റെയ്ഡുകളിൽ ലഭിച്ച നിർണ്ണായക തെളിവുകളും ഡിജിറ്റൽ രേഖകളും ഇ.ഡി കോടതിയെ ബോധിപ്പിക്കും. ഇതിനൊപ്പം, റെയ്ഡ് കഴിഞ്ഞ് മടങ്ങിയ ഇ.ഡി ഉദ്യോഗസ്ഥർക്ക് നേരെ ഉണ്ടായ സി.പി.ഐ.എം-എസ്.എഫ്.ഐ പ്രവർത്തകരുടെ ആക്രമണവും, ഔദ്യോഗിക വാഹനം തകർത്ത വിവരവും കേന്ദ്ര ഏജൻസി കോടതിയുടെ ശ്രദ്ധയിൽപ്പെടുത്തും. ഈ ആക്രമണവുമായി ബന്ധപ്പെട്ട് എസ്.എഫ്.ഐ ജില്ലാ പ്രസിഡന്റ് ഉൾപ്പെടെ 26 പേരെ പോലീസ് ഇതിനകം അറസ്റ്റ് ചെയ്തിട്ടുണ്ട്. പ്രതികൾക്ക് ജാമ്യം ലഭിക്കുന്നത് തടയാൻ കുറ്റപത്രം വേഗത്തിൽ സമർപ്പിക്കാനാണ് പോലീസ് നീക്കം.
Summary: The Kerala High Court is set to consider an appeal filed by CMRL seeking a stay on the ongoing Enforcement Directorate (ED) investigation. The ED will strongly oppose the plea through the Additional Solicitor General, presenting evidence gathered during recent raids. Additionally, the agency will inform the court about the recent attacks on its officials by political party workers during the investigation.
