പത്തനംതിട്ട: അതീവ സുരക്ഷാ മേഖലയായ ശബരിമല സന്നിധാനത്തിന് മുകളിലൂടെ ഹെലികോപ്റ്റർ താഴ്ന്നു പറന്നത് ആശങ്ക പരത്തി. വ്യാഴാഴ്ച രാവിലെ 11 മണിയോടെയായിരുന്നു സംഭവം. കോസ്റ്റ് ഗാർഡിന്റെ ‘ചേതക്’ ഹെലികോപ്റ്ററാണ് ക്ഷേത്രത്തിന് മുകളിലൂടെ പറന്നത്. സംഭവത്തിൽ സ്പെഷ്യൽ കമ്മീഷണർ എഡിജിപി എസ്. ശ്രീജിത്തിനോട് അന്വേഷണം നടത്തി റിപ്പോർട്ട് നൽകാൻ നിർദ്ദേശം നൽകി.(Helicopter flies low over Sabarimala shrine, orders investigation and report)
സാങ്കേതികമായ കാരണങ്ങളാലാണ് ഹെലികോപ്റ്റർ സന്നിധാനത്തിന് മുകളിലെത്തിയതെന്നാണ് കോസ്റ്റ് ഗാർഡ് നൽകുന്ന വിശദീകരണം. അന്തരീക്ഷം മേഘാവൃതമായപ്പോൾ ദിശ മാറി സഞ്ചരിക്കേണ്ടി വന്നതാണെന്നും, കാഴ്ച മറഞ്ഞതിനെ തുടർന്ന് താഴ്ന്നു പറന്നതാണെന്നുമാണ് പ്രാഥമിക വിശദീകരണം. മറ്റ് സുരക്ഷാ പ്രശ്നങ്ങളൊന്നുമില്ലെന്നും അധികൃതർ വ്യക്തമാക്കി.
ഹെലികോപ്റ്റർ സന്നിധാനത്തിന് മുകളിലെത്തിയതിനെക്കുറിച്ച് പമ്പ പോലീസിന് മുൻകൂട്ടി വിവരമൊന്നും ലഭിച്ചിരുന്നില്ല. അതീവ സുരക്ഷാ ജാഗ്രത നിലനിൽക്കുന്ന മേഖലയായതിനാൽ സംഭവത്തെ ഗൗരവത്തോടെയാണ് പോലീസ് കാണുന്നത്. കഴിഞ്ഞ ദിവസങ്ങളിൽ പ്രദേശത്ത് ശക്തമായ മഴയും മൂടൽമഞ്ഞും അനുഭവപ്പെട്ടിരുന്നു.
