തിരുവനന്തപുരം: ആരോഗ്യവകുപ്പിലെ തെറ്റായ വ്യവസ്ഥിതികളെയും പ്രവണതകളെയും ശരിയാക്കാനുള്ള പരിശ്രമങ്ങൾ പാതിവഴിയിൽ ഉപേക്ഷിച്ച് താൻ മടങ്ങില്ലെന്ന് ആരോഗ്യവകുപ്പ് മന്ത്രി കെ. മുരളീധരൻ (K muraleedharan minister). ഒട്ടേറെ കാര്യങ്ങൾ പറഞ്ഞു മടുത്ത്, മതിയാക്കിപ്പോകുമെന്ന് ആരും ചിന്തിക്കേണ്ടതില്ലെന്നും ജനനന്മയുള്ള നല്ല കാര്യങ്ങളിൽ താൻ കടുത്ത പിടിവാശിയുള്ള വ്യക്തിയാണെന്നും അദ്ദേഹം വ്യക്തമാക്കി. സംസ്ഥാന ആരോഗ്യവകുപ്പിന്റെ കഴിഞ്ഞ 50 ദിവസത്തെ പ്രവർത്തനങ്ങൾ അടങ്ങുന്ന പ്രോഗ്രസ് റിപ്പോർട്ട് പ്രകാശനം ചെയ്ത് സംസാരിക്കുകയായിരുന്നു മന്ത്രി.
ആരോഗ്യവകുപ്പിലെ അടിസ്ഥാന സൗകര്യ വികസനത്തിന് സർക്കാർ ഫണ്ടിന് പുറമെ കോർപ്പറേറ്റ് സോഷ്യൽ റെസ്പോൺസിബിലിറ്റി (സിഎസ്ആർ) ഫണ്ട് കൂടി കാര്യക്ഷമമായി പ്രയോജനപ്പെടുത്തുമെന്ന് മന്ത്രി അറിയിച്ചു. ആരോഗ്യവകുപ്പിൽ കഴിഞ്ഞ 10 വർഷമായി നടന്ന പർച്ചേസുകളെക്കുറിച്ച് പ്രഖ്യാപിച്ച അന്വേഷണത്തിൽ രാഷ്ട്രീയമുണ്ടെന്ന് ആരും കരുതേണ്ടതില്ല. ജനങ്ങളുടെ നികുതിപ്പണം എവിടെയെങ്കിലും പാഴായിട്ടുണ്ടെങ്കിൽ അതിന് ഉത്തരവാദികളായവരെ കണ്ടെത്തുക തന്നെ വേണമെന്നത് സർക്കാരിന്റെ നിർബന്ധമാണ്.
വകുപ്പിലെ ഒഴിവുകളെല്ലാം കൃത്യമായി പിഎസ്സിക്ക് റിപ്പോർട്ട് ചെയ്യുമെന്നും നിലവിൽ റാങ്ക് ലിസ്റ്റ് നിലനിൽക്കുന്ന തസ്തികകളിൽ താത്കാലിക നിയമനങ്ങൾ പ്രോത്സാഹിപ്പിക്കില്ലെന്നും അദ്ദേഹം വ്യക്തമാക്കി. കഷ്ടപ്പെട്ട് പഠിച്ച് പരീക്ഷയെഴുതുന്ന ഉദ്യോഗാർഥികളുടെ ശാപം വാങ്ങാൻ സർക്കാർ ആഗ്രഹിക്കുന്നില്ല.
പ്രാദേശികവും രാഷ്ട്രീയവുമായ തർക്കങ്ങളുടെ പേരിൽ കേരളത്തിന് ലഭിക്കേണ്ട എയിംസ് (AIIMS) നഷ്ടപ്പെടാൻ അനുവദിക്കില്ല. അതോടൊപ്പം, സർക്കാർ ആശുപത്രികളിലെ വികസന സമിതികളിൽ (HMC) രാഷ്ട്രീയ പ്രവർത്തകർക്ക് പുറമെ, പട്ടികജാതി വിഭാഗത്തിൽ നിന്നും വനിതാ വിഭാഗത്തിൽ നിന്നും ഓരോ പ്രതിനിധികളെക്കൂടി സർക്കാർ നേരിട്ട് നാമനിർദേശം ചെയ്യുമെന്നും മന്ത്രി കൂട്ടിച്ചേർത്തു.
Story Summary:
Health Minister K. Muraleedharan asserted that he will not back down from correcting systemic flaws within the health department. Releasing a 50-day progress report, he stated that vacancies will be reported to the PSC promptly, temporary appointments will be discouraged, and an investigation into procurement from the past 10 years will proceed strictly to protect public funds.
