തിരുവനന്തപുരം: തലസ്ഥാനത്തെ പ്രമുഖ വിനോദകേന്ദ്രമായ വെഞ്ഞാറമൂട് ഹാപ്പിലാൻഡ് അമ്യൂസ്മെന്റ് പാർക്കിലുണ്ടായ (Happyland amusement park accident Thiruvananthapuram) ദരുണമായ റൈഡ് അപകടത്തിൽ പാർക്ക് അധികൃതർക്കെതിരെ പോലീസ് കേസെടുത്തു. വെഞ്ഞാറമൂട് പോലീസാണ് അനാസ്ഥയ്ക്കും സുരക്ഷാ വീഴ്ചയ്ക്കും ക്രിമിനൽ കേസെടുത്തത്. സംഭവത്തെക്കുറിച്ച് സമഗ്രമായി അന്വേഷിച്ച് തിരുവനന്തപുരം ജില്ലാ കളക്ടർക്ക് പോലീസ് അടിയന്തിര റിപ്പോർട്ട് നൽകും. പാർക്കിലെ ജയന്റ് വീൽ (Giant Wheel) റൈഡ് വലിയ ഉയരത്തിൽ നിന്നും പൊട്ടി താഴേക്ക് വീണായിരുന്നു വൻ അപകടമുണ്ടായത്. അപകടത്തിൽ പരിക്കേറ്റവരിൽ ഒരേ കുടുംബത്തിലെ അഞ്ച് പേർ ഉൾപ്പെട്ടിട്ടുണ്ട്.
റൈഡ് ഏറ്റവും ഉയർന്ന പൊക്കത്തിൽ എത്തിയ സമയത്ത് അതിന്റെ പ്രധാന വെൽഡിങ് ഭാഗം പെട്ടെന്ന് വേർപെട്ടുപോയതാണ് റൈഡ് തകർന്നു വീഴാൻ കാരണമായതെന്നാണ് പ്രാഥമിക നിഗമനം. അപകടം നടക്കുന്ന സമയത്ത് ആകെ 26 പേർ ഈ ജയന്റ് വീൽ റൈഡിനുള്ളിൽ ഉണ്ടായിരുന്നു. അപകടം നടന്ന് മണിക്കൂറുകൾ കഴിഞ്ഞിട്ടാണ് പാർക്ക് അധികൃതരുടെ ഭാഗത്തുനിന്നും പ്രാഥമിക രക്ഷാപ്രവർത്തനം പോലും ആരംഭിച്ചതെന്ന് നാട്ടുകാർ കടുത്ത ഭാഷയിൽ ആരോപിച്ചു. അപകടമുണ്ടായാൽ ജീവനക്കാരെ രക്ഷിക്കാനുള്ള യാതൊരുവിധ സുരക്ഷാ മുൻകരുതലുകളും ഫസ്റ്റ് എയ്ഡ് സംവിധാനങ്ങളും പാർക്കിനുള്ളിൽ ഉണ്ടായിരുന്നില്ല. പരിക്കേറ്റവരെ ആശുപത്രിയിലേക്ക് മാറ്റാനുള്ള ആംബുലൻസ് സംവിധാനം എത്തിച്ചേരാൻ കടുത്ത വീഴ്ചയുണ്ടായതായും പ്രദേശവാസികൾ പറഞ്ഞു. ഹാപ്പിലാൻഡിൽ മുൻപും സമാനമായ രീതിയിൽ റൈഡ് അപകടങ്ങൾ സംഭവിച്ചിട്ടുണ്ടെന്നും അധികൃതർ അത് മൂടിവെക്കുകയായിരുന്നുവെന്നും നാട്ടുകാർ കൂട്ടിച്ചേർത്തു.
