റിപ്പോർട്ട്: അൻവർ ഷരിഫ്
എടവണ്ണപ്പാറ: മഞ്ഞപ്പിത്തം, ഡെങ്കിപ്പനി, ഷിഗല്ല തുടങ്ങിയ പകർച്ചവ്യാധികൾ വ്യാപകമായി പടർന്നുപിടിക്കുന്ന സാഹചര്യത്തിൽ വാഴക്കാട് ഗ്രാമപഞ്ചായത്തും കുടുംബാരോഗ്യ കേന്ദ്രവും ചേർന്ന് എടവണ്ണപ്പാറയിൽ വ്യാപകമായ പരിശോധന നടത്തി (Edavannappara Food Inspection). പ്രദേശത്തെ വിവിധ ഹോട്ടലുകൾ, റസ്റ്റോറന്റുകൾ, കൂൾബാറുകൾ എന്നിവിടങ്ങളിൽ നടത്തിയ പരിശോധനയിൽ ഭക്ഷണശാലകളിലെ ശുചിത്വവും സുരക്ഷയും ഉറപ്പാക്കാനാണ് അധികൃതർ ലക്ഷ്യമിട്ടത്. ഭക്ഷണ പദാർത്ഥങ്ങളുടെ ഗുണനിലവാരം, മാലിന്യ സംസ്കരണ രീതികൾ, കുടിവെള്ളത്തിന്റെ ശുദ്ധത തുടങ്ങിയവ പ്രത്യേകം പരിശോധനയ്ക്ക് വിധേയമാക്കി.
പരിശോധനയിൽ ശുചിത്വ മാനദണ്ഡങ്ങൾ പാലിക്കുന്നതിൽ അലംഭാവം കാണിച്ച സ്ഥാപനങ്ങൾക്ക് പിഴ ചുമത്തുകയും, അടിയന്തരമായി ശുചീകരണ പ്രവർത്തനങ്ങൾ പൂർത്തിയാക്കാൻ കർശന നിർദ്ദേശം നൽകുകയും ചെയ്തു. ജനങ്ങളുടെ ആരോഗ്യസുരക്ഷയിൽ യാതൊരു വിട്ടുവീഴ്ചയും ഉണ്ടാകില്ലെന്നും, വരും ദിവസങ്ങളിലും പരിശോധനകൾ കൂടുതൽ ശക്തമായി തുടരുമെന്നും പഞ്ചായത്ത് അധികൃതർ അറിയിച്ചു. പകർച്ചവ്യാധികളെ പ്രതിരോധിക്കുന്നതിന്റെ ഭാഗമായി ഇത്തരം നടപടികൾ തുടരേണ്ടത് അനിവാര്യമാണെന്ന് ആരോഗ്യ വിദഗ്ധരും ചൂണ്ടിക്കാട്ടുന്നു.
പഞ്ചായത്ത് സെക്രട്ടറി ജിജി ബി, ഹെഡ് ക്ലർക്ക് സൈദ് അക്ബർ ബാദ്ഷാ ഖാൻ, പഞ്ചായത്ത് ഹെൽത്ത് ഇൻസ്പെക്ടർ ഡാനിഷ് വി, ഫാമിലി ഹെൽത്ത് സെന്റർ ഹെൽത്ത് ഇൻസ്പെക്ടർ ഷാജു ഡി, ജൂനിയർ ഹെൽത്ത് ഇൻസ്പെക്ടർ അഭിജിത്ത് ബി അശോക്, ക്ലർക്ക് ജിതിൻ സി എന്നിവരടങ്ങുന്ന സംഘമാണ് പരിശോധനയ്ക്ക് നേതൃത്വം നൽകിയത്.
Summary: In response to the rising threat of infectious diseases like jaundice, dengue, and shigella, the Vazhakkad Grama Panchayat and the local Family Health Centre conducted surprise inspections at various hotels, restaurants, and cool bars in Edavannappara. The inspection team scrutinized food hygiene, waste management, and the quality of drinking water, imposing fines and issuing notices to establishments found in violation of sanitation standards.
