തിരുവനന്തപുരം : മന്ത്രി സണ്ണി ജോസഫിന്റെ സ്പെഷ്യൽ പ്രൈവറ്റ് സെക്രട്ടറിയായി കെപിസിസി സെക്രട്ടറി ചന്ദ്രൻ തില്ലങ്കേരിയെ നിയമിച്ചു. ബന്ധുനിയമന വിവാദത്തെത്തുടർന്ന് സഹോദരീഭർത്താവ് ബെന്നി തോമസ് രാജിവെച്ച ഒഴിവിലേക്കാണ് നിയമനം. മുഖ്യമന്ത്രിയുടെ ഓഫീസ് ഈ പുതിയ നിയമനത്തിന് ഔദ്യോഗികമായി അനുമതി നൽകി.(Chandran Thillankeri Appointed As Special Private Secretary To Minister Sunny Joseph)
മട്ടന്നൂർ മണ്ഡലത്തിലെ യുഡിഎഫ് സ്ഥാനാർഥിയായിരുന്ന ചന്ദ്രൻ തില്ലങ്കേരിയുടെ പേര് മന്ത്രി തന്നെയാണ് നിർദേശിച്ചത്. നേരത്തെ മന്ത്രിയുടെ പേഴ്സണൽ സ്റ്റാഫിൽ ബന്ധുവിനെ നിയമിച്ചത് വലിയ രാഷ്ട്രീയ വിവാദങ്ങൾക്ക് തിരികൊളുത്തിയിരുന്നു. നിയമപരമായി യാതൊരു തടസ്സവും ഉണ്ടായിരുന്നില്ലെന്ന് ആവർത്തിച്ചാണ് ബെന്നി തോമസ് സ്വയം ഒഴിഞ്ഞത്.
മുഖ്യമന്ത്രിയുടെ നിർദേശപ്രകാരമാണോ രാജിയെന്ന മാധ്യമങ്ങളുടെ ചോദ്യത്തോട് മന്ത്രി വ്യക്തമായ മറുപടി നൽകാൻ തയ്യാറായില്ല. ബെന്നി തോമസിന്റെ അനുഭവസമ്പത്ത് തന്റെ വകുപ്പിന് വലിയ മുതൽക്കൂട്ടായിരുന്നുവെന്ന് മന്ത്രി സണ്ണി ജോസഫ് വാർത്താ സമ്മേളനത്തിൽ പറഞ്ഞു. വ്യക്തിപരമായ തീരുമാനത്തിന്റെ അടിസ്ഥാനത്തിലാണ് രാജിയെന്നും, ബന്ധുത്വം പരിഗണിച്ചല്ല അദ്ദേഹത്തെ നിയമിച്ചതെന്നും മന്ത്രി കൂട്ടിച്ചേർത്തു.
Story Summary
KPCC Secretary Chandran Thillankeri has been appointed as the new Special Private Secretary to Minister Sunny Joseph. This appointment follows the resignation of Benny Thomas, who stepped down from the position amidst a political controversy over allegations of nepotism.
