തിരുവനന്തപുരം: പിഎം ശ്രീ സ്കൂൾ പദ്ധതിയുമായി ബന്ധപ്പെട്ട വിവാദങ്ങളിൽ സംസ്ഥാന സർക്കാർ സ്വീകരിക്കേണ്ട തുടർനടപടികൾ മന്ത്രിസഭാ ഉപസമിതി തീരുമാനിക്കുമെന്ന് വിദ്യാഭ്യാസ മന്ത്രി എന്. ഷംസുദ്ദീന്. പദ്ധതിയുടെ എല്ലാ വശങ്ങളും വിശദമായി പരിശോധിച്ച ശേഷം ഉപസമിതി സമർപ്പിക്കുന്ന റിപ്പോർട്ടിന്റെ അടിസ്ഥാനത്തിൽ മുഖ്യമന്ത്രി അന്തിമ തീരുമാനം പ്രഖ്യാപിക്കുമെന്ന് അദ്ദേഹം വ്യക്തമാക്കി.(Cabinet Sub Committee To Review PM SHRI School Project)
പദ്ധതിയുമായി ബന്ധപ്പെട്ട് നിലനിൽക്കുന്ന പ്രതിസന്ധികൾക്ക് കാരണം മുൻ സർക്കാരാണെന്നും മന്ത്രി കുറ്റപ്പെടുത്തി. ഈ വിഷയത്തിൽ കേന്ദ്രവുമായി ധാരണാപത്രം ഒപ്പിട്ടത് എൽഡിഎഫ് സർക്കാരാണ്. ആ വസ്തുത ആർക്കും നിഷേധിക്കാനാവില്ല. എന്നാൽ, അന്ന് ഈ കരാറിൽ ഒപ്പിട്ടപ്പോൾ വേണ്ടത്ര കൂടിയാലോചനകൾ നടത്തിയിരുന്നില്ലെന്നും, ഇത് എൽഡിഎഫിനുള്ളിൽ തന്നെ വലിയ വിവാദങ്ങൾക്ക് തിരികൊളുത്തിയിരുന്നതായും അദ്ദേഹം ചൂണ്ടിക്കാട്ടി.
പിഎം ശ്രീ പദ്ധതിയിൽ ഒപ്പുവെക്കാത്തതിനെത്തുടർന്ന് കേന്ദ്രം എസ്എസ്കെ ഫണ്ട് തടഞ്ഞുവെച്ചിരുന്നു. എന്നാൽ, കരാറിൽ ഒപ്പുവെച്ചതിന്റെ നാലാം നാൾ തന്നെ 99 കോടി രൂപ അനുവദിക്കുകയുണ്ടായി. ഉപസമിതിയുടെ അന്തിമ റിപ്പോർട്ട് വരുന്നത് വരെ പദ്ധതിയുമായി ബന്ധപ്പെട്ട തുടർനടപടികൾ താൽക്കാലികമായി നിർത്തിവെക്കാൻ കേന്ദ്രത്തിന് കത്ത് നൽകിയിട്ടുണ്ട്. പദ്ധതിയിൽ ഉൾപ്പെടുത്തേണ്ട സ്കൂളുകളുടെ തിരഞ്ഞെടുപ്പാണ് അടുത്ത ഘട്ടം. ഇക്കാര്യത്തിൽ ഉപസമിതിയുടെ തീരുമാനത്തിന് ശേഷം മാത്രം നടപടികളിലേക്ക് കടക്കും എന്നും അദ്ദേഹം കൂട്ടിച്ചേർത്തു.
Story Summary
Education Minister N. Samsudheen announced that a cabinet sub-committee will review the PM SHRI school project and decide on the state’s further actions. He blamed the previous LDF government for the current crisis, noting that their unilateral decision to sign the agreement without internal consultation led to the withholding of central funds.
