പ്രതിപക്ഷ ഉപനേതാവ് സ്ഥാനത്തിനായുള്ള അവകാശവാദത്തിൽ ഉറച്ചുനിൽക്കുന്നതായി സിപിഐ സംസ്ഥാന സെക്രട്ടറി ബിനോയ് വിശ്വം. മുന്നണിയിലെ സ്ഥാനമാനങ്ങൾ ചെറുതായാലും വലുതായാലും അത് പങ്കുവെക്കപ്പെടണം. എൽഡിഎഫ് ഒറ്റക്കെട്ടായി മുന്നോട്ടുപോകണമെങ്കിൽ അത്തരം പങ്കുവെക്കലുകൾ അനിവാര്യമാണെന്നും അദ്ദേഹം വ്യക്തമാക്കി (Binoy Viswam on Deputy Leader of Opposition). കീഴ്വഴക്കങ്ങൾ പറഞ്ഞ് ഒഴിഞ്ഞുമാറാൻ ആർക്കും കഴിയില്ലെന്നും, കാലോചിതമായ മാറ്റങ്ങൾ വരുത്താൻ തയ്യാറാകണമെന്നും ബിനോയ് വിശ്വം പറഞ്ഞു.
സ്ഥാനമാനങ്ങൾ വീതിച്ചുനൽകുന്നത് എൽഡിഎഫിനെ ദുർബലപ്പെടുത്താനല്ല, മറിച്ച് മുന്നണിയെ കൂടുതൽ ശക്തമാക്കാനാണ്. കീഴ്വഴക്കങ്ങളല്ല, രാഷ്ട്രീയവും എൽഡിഎഫിന്റെ ഐക്യവുമാണ് വലുതെന്ന് അദ്ദേഹം ഓർമ്മിപ്പിച്ചു. പ്രതിപക്ഷ ഉപനേതാവ് സ്ഥാനം സിപിഐക്ക് അവകാശപ്പെട്ടതാണെന്ന കാര്യത്തിൽ പാർട്ടിക്കുള്ളിൽ ഒരുതരത്തിലുള്ള തർക്കമോ സംശയമോ ഇല്ലെന്നും അദ്ദേഹം കൂട്ടിച്ചേർത്തു. ഈ വിഷയത്തിൽ സിപിഐഎം നേതൃത്വവുമായി ചൊവ്വാഴ്ച ചർച്ച നടക്കാനിരിക്കെയാണ് ബിനോയ് വിശ്വം നിലപാട് കടുപ്പിച്ചത്.
പതിവിന് വിപരീതമായി സിപിഐയുടെ സംസ്ഥാന ആസ്ഥാനമായ എം.എൻ. സ്മാരകത്തിൽ വെച്ചാണ് ഇരുപാർട്ടികളും തമ്മിലുള്ള ചർച്ച നടക്കുക. സി.പി.ഐയുടെ വിട്ടുവീഴ്ചയില്ലാത്ത നിലപാടുകൾക്കിടയിൽ, അവരുടെ ആസ്ഥാനത്തെത്തി ചർച്ച നടത്തുന്നതിലൂടെ സമവായത്തിലെത്താൻ കഴിയുമെന്ന പ്രതീക്ഷയിലാണ് സി.പി.ഐ.എം നേതൃത്വം. 13, 14 തീയതികളിൽ ചേരുന്ന സി.പി.ഐ നേതൃയോഗങ്ങളും ചർച്ചയുടെ ഫലത്തെ സ്വാധീനിക്കും. നേരത്തെ ബ്രൂവറി വിഷയത്തിലും സമാനമായ രീതിയിൽ എം.എൻ. സ്മാരകത്തിൽ നടന്ന ചർച്ചയിലൂടെ സമവായത്തിലെത്താൻ കഴിഞ്ഞിരുന്നു.
Summary: CPI State Secretary Binoy Viswam has reiterated the party’s firm demand for the post of Deputy Leader of the Opposition, asserting that political necessity and LDF unity take precedence over traditional customs. As the CPI and CPI(M) prepare for a crucial bilateral discussion at the CPI state headquarters on Tuesday, the leadership hopes to reach a consensus, similar to previous instances where dialogue led to resolution.
