ബെംഗളൂരു: ബെംഗളൂരുവിലെ മഡിവാളയിൽ മലയാളി വിദ്യാർഥിനിയെ ബലാത്സംഗം ചെയ്ത കേസിലെ ഒന്നാംപ്രതി പിടിയിൽ (Bengaluru Madiwala case). വയനാട് സുൽത്താൻ ബത്തേരി സ്വദേശിയായ ഹൈനസിനെയാണ് വെള്ളിയാഴ്ച വൈകീട്ടോടെ കർണാടക പോലീസ് വയനാട്ടിൽ നിന്നും അറസ്റ്റ് ചെയ്തത്. തുടർന്ന് പ്രതിയെ വൈദ്യപരിശോധനയ്ക്ക് വിധേയമാക്കിയ ശേഷം ട്രാൻസിറ്റ് വാറന്റ് മുഖേന ബെംഗളൂരുവിൽ എത്തിക്കുകയായിരുന്നു. നിലവിൽ ജുഡീഷ്യൽ കസ്റ്റഡിയിലുള്ള ഇയാളെ കൂടുതൽ നിയമനടപടികൾക്കായി ഉടൻ കോടതിയിൽ ഹാജരാക്കും.
മേയ് 12-നാണ് ഇരുപതുകാരിയായ മലയാളി പെൺകുട്ടി മഡിവാളയിലെ സുഹൃത്തുക്കളുടെ താമസസ്ഥലത്തുവെച്ച് ക്രൂരമായ പീഡനത്തിനിരയായത്. ബെംഗളൂരുവിൽ പഠിക്കുന്ന പെൺകുട്ടി സുഹൃത്തുക്കൾ നടത്തുന്ന കഫേയിൽ പാർട്ട് ടൈം ജോലി ചെയ്തുവരികയായിരുന്നു. സംഭവദിവസം സുഖമില്ലാതിരുന്ന പെൺകുട്ടി കഫേയ്ക്ക് സമീപത്തെ താമസസ്ഥലത്ത് വിശ്രമിക്കുകയായിരുന്നു. ഈ സമയം അവിടെയെത്തിയ ഹൈനസ്, സുഹൃത്തുക്കൾ പുറത്തുപോയ തക്കം നോക്കി മുറിയിൽ അതിക്രമിച്ചുകയറി പെൺകുട്ടിയെ ബലാത്സംഗം ചെയ്യുകയായിരുന്നു.
സംഭവം നടന്നതിന്റെ പിറ്റേദിവസം തന്നെ പെൺകുട്ടി മഡിവാള പോലീസ് സ്റ്റേഷനിലെത്തി പരാതി നൽകിയിരുന്നെങ്കിലും കേസ് രജിസ്റ്റർ ചെയ്യാൻ പോലീസ് തയ്യാറായില്ല. പരാതി നൽകരുതെന്ന് ആവശ്യപ്പെട്ട് പോലീസ് ഉദ്യോഗസ്ഥർ തങ്ങളെ അപമാനിച്ചതായും പെൺകുട്ടിയും സുഹൃത്തുക്കളും ആരോപിച്ചു.
മഡിവാള പോലീസ് കൈമലർത്തിയതോടെ പെൺകുട്ടിയും സുഹൃത്തുക്കളും മേയ് 18-ന് ബെംഗളൂരു നോർത്ത് ഈസ്റ്റ് ഡിസിപിയെ നേരിട്ട് കണ്ട് പരാതി നൽകുകയായിരുന്നു. തുടർന്ന് ഡിസിപിയുടെ കർശന നിർദേശപ്രകാരമാണ് സംഭവത്തിൽ ഒടുവിൽ എഫ്ഐആർ രജിസ്റ്റർ ചെയ്തത്.
പെൺകുട്ടിയുടെ സുഹൃത്തുക്കൾ മഡിവാളയിൽ പുതിയ കഫേ ആരംഭിച്ചപ്പോൾ സ്ഥലം കണ്ടെത്തി നൽകിയതും മറ്റ് സഹായങ്ങൾ ചെയ്തതും ഹൈനസ് ആയിരുന്നു. എന്നാൽ പിന്നീട് കഫേ നഷ്ടത്തിലായതോടെ ഇത് വിൽക്കാൻ ഇവർ തീരുമാനിക്കുകയും ഇതിനായി വീണ്ടും ഹൈനസിന്റെ സഹായം തേടുകയും ചെയ്തു. കഫേ വിൽപ്പനയുമായി ബന്ധപ്പെട്ട കാര്യങ്ങൾ സംസാരിക്കാനെന്ന വ്യാജേനയാണ് മേയ് 12-ന് പ്രതി പെൺകുട്ടിയുടെ താമസസ്ഥലത്ത് എത്തിയത്.
Story Summary: The prime accused, Hinas from Wayanad Sultan Bathery, has been arrested for allegedly raping a 20-year-old Malayali student in Madivala, Bengaluru. The arrest comes after the victim approached the Bengaluru North East DCP, alleging that the local Madivala police initially refused to register her case.
