കണ്ണൂർ: ദിവസങ്ങൾ നീണ്ട അനിശ്ചിതത്വങ്ങൾക്കും ഡൽഹിയിൽ നടന്ന മാരത്തോൺ ചർച്ചകൾക്കുമൊടുവിൽ കണ്ണൂർ നിയമസഭാ മണ്ഡലത്തിലെ കോൺഗ്രസ് സ്ഥാനാർത്ഥിയെ പ്രഖ്യാപിച്ചു. സിറ്റിംഗ് എംപി കെ. സുധാകരന് സീറ്റ് നൽകേണ്ടതില്ലെന്ന് എഐസിസി അധ്യക്ഷൻ മല്ലികാർജുൻ ഖർഗെ കർശന നിലപാടെടുത്തതോടെ, കണ്ണൂർ മുൻ മേയർ അഡ്വ. ടി.ഒ. മോഹനൻ സ്ഥാനാർത്ഥിയാകും.(No seat for K Sudhakaran in Kannur, What is his next move? )
കണ്ണൂർ ലോക്സഭാ മണ്ഡലത്തിൽ നിന്ന് വമ്പിച്ച വോട്ടുകളുടെ ഭൂരിപക്ഷത്തിൽ വിജയിച്ച സുധാകരൻ, ഇത്തവണ നിയമസഭയിലേക്ക് മത്സരിക്കണമെന്ന ഉറച്ച നിലപാടിലായിരുന്നു. തിരഞ്ഞെടുപ്പ് വിജ്ഞാപനത്തിന് മുൻപേ സ്വയം സ്ഥാനാർത്ഥിത്വം പ്രഖ്യാപിച്ചത് പാർട്ടിക്കുള്ളിൽ വലിയ ഭിന്നതയുണ്ടാക്കി. എംപിമാർ മത്സരിക്കേണ്ടതില്ലെന്ന പൊതുനയത്തിൽ സുധാകരന് മാത്രമായി ഇളവ് നൽകാനാവില്ലെന്ന് ഹൈക്കമാൻഡ് വ്യക്തമാക്കുകയായിരുന്നു.
സുധാകരന്റെ സ്ഥാനാർത്ഥിത്വത്തിനായി കണ്ണൂരിലും തിരുവനന്തപുരത്തും അണികൾ തെരുവിലിറങ്ങുകയും ഫ്ലക്സ് ബോർഡുകൾ ഉയർത്തുകയും ചെയ്തിരുന്നു. ഈ കടുത്ത സമ്മർദ്ദങ്ങൾക്കിടയിലും മല്ലികാർജുൻ ഖർഗെ തന്റെ നിലപാടിൽ ഉറച്ചുനിന്നതാണ് ടി.ഒ. മോഹനന് വഴിതുറന്നത്. സ്ഥാനാർത്ഥി പട്ടിക പുറത്തുവന്നിട്ടും തന്റെ നിലപാടിൽ മാറ്റമില്ലെന്ന സൂചനയാണ് സുധാകരൻ നൽകുന്നത്. ഇന്ന് ഉച്ചയ്ക്ക് അദ്ദേഹം മാധ്യമങ്ങളെ കണ്ടേക്കും. വാർത്താസമ്മേളനത്തിന് മുൻപായി സുധാകരനെ തണുപ്പിക്കാൻ മുതിർന്ന നേതാക്കൾ തിരക്കിട്ട ചർച്ചകൾ നടത്തുന്നുണ്ട്.
