ടെഹ്റാൻ: തങ്ങൾക്കെതിരെ അമേരിക്കൻ സൈനിക നീക്കം ശക്തമായി തുടരുന്ന പശ്ചാത്തലത്തിൽ, നിലപാട് വ്യക്തമാക്കി ഇറാൻ വിദേശകാര്യമന്ത്രി അബ്ബാസ് അരാഗ്ചി. യുഎസ് പ്രസിഡന്റ് ഡൊണാൾഡ് ട്രംപിന്റെ പ്രത്യേക പ്രതിനിധി സ്റ്റീവ് വിറ്റ്കോഫുമായി നടത്തിയ ചർച്ചയുടെ വിശദാംശങ്ങൾ പങ്കുവെക്കവേയാണ്, ഭീഷണികൾക്ക് മുന്നിൽ ഇറാൻ വഴങ്ങില്ലെന്ന് അദ്ദേഹം വ്യക്തമാക്കിയത്. ഏത് നിമിഷവും ബോംബാക്രമണം ഉണ്ടായേക്കാമെന്ന ഭീതി നിലനിൽക്കുന്ന അന്തരീക്ഷത്തിൽ എപ്പോഴെങ്കിലും ചർച്ച നടത്തിയിട്ടുണ്ടോ എന്ന് താൻ അമേരിക്കൻ നയതന്ത്രജ്ഞനോട് ചോദിച്ചതായി അരാഗ്ചി വെളിപ്പെടുത്തി. ഇറാനിയൻ വാർത്താ ഏജൻസിയായ ‘മെഹറിന്’ നൽകിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്.(Iranian Foreign Minister Abbas Araghchi Rejects US Threats During High Stakes Talks)
ശത്രുതാപരമായ അന്തരീക്ഷത്തിലാണ് ചർച്ചകൾ നടന്നതെന്ന് വ്യക്തമാക്കിയ അരാഗ്ചി, ഫോൺ സംഭാഷണത്തിനിടയിലോ കുടുംബവുമായി സംസാരിക്കുമ്പോഴോ ഇത് അവസാനത്തേതാകാം എന്ന് ചിന്തിക്കേണ്ടി വരുന്ന അവസ്ഥയെക്കുറിച്ച് വിറ്റ്കോഫിനോട് സംസാരിച്ചതായി ഓർത്തെടുത്തു. എന്നാൽ ഇത്തരം ഭീഷണികൾ നിലനിൽക്കുമ്പോഴും ടെഹ്റാൻ പിന്നോട്ട് പോകാൻ തയ്യാറായില്ലെന്നും, ഭീഷണിപ്പെടുത്തിയോ കൈക്കൂലി നൽകിയോ തങ്ങളെ കീഴ്പ്പെടുത്താമെന്ന് കരുതേണ്ടെന്നും അദ്ദേഹം കൂട്ടിച്ചേർത്തു. കഴിഞ്ഞ വർഷം ആരംഭിച്ച ആണവ ചർച്ചകളുടെ തുടർച്ചയായി മസ്കറ്റ്, റോം, ജനീവ, ഇസ്ലാമാബാദ് എന്നിവിടങ്ങളിൽ വെച്ച് ഇരുവരും തമ്മിൽ ആശയവിനിമയം നടത്തിയിരുന്നെങ്കിലും, ഇവ ഔദ്യോഗിക ചർച്ചകളല്ലെന്നാണ് ഇറാന്റെ നിലപാട്.
അമേരിക്കൻ സൈനിക നടപടിയിലൂടെ വെനസ്വേലൻ പ്രസിഡന്റ് നിക്കോളാസ് മഡുറോയെ പിടികൂടിയതുപോലെ ഇറാനെ വരുതിയിലാക്കാമെന്ന് വാഷിംഗ്ടൺ കരുതേണ്ടെന്ന് അരാഗ്ചി മുന്നറിയിപ്പ് നൽകി. “ഇറാൻ വെനസ്വേലയല്ല”, ഒരാളെ പിടികൂടിയതുകൊണ്ട് മാത്രം ഇവിടുത്തെ നേതൃത്വത്തെ കീഴടക്കാമെന്ന് അമേരിക്ക പ്രതീക്ഷിക്കേണ്ടതില്ലെന്നും അദ്ദേഹം പറഞ്ഞു. ജോർദാനിലെ യുഎസ് സൈനിക താവളത്തിന് നേരെ ഉണ്ടായ ഇറാൻ മിസൈലാക്രമണത്തിൽ രണ്ട് അമേരിക്കൻ സൈനികർ കൊല്ലപ്പെട്ടതിനെത്തുടർന്ന്, ഇറാനെതിരെയുള്ള വ്യോമാക്രമണം യുഎസ് ശക്തമാക്കിയിരിക്കുകയാണ്. ഇതിന് മറുപടിയായി ഗൾഫ് മേഖലയിലെ യുഎസ് താവളങ്ങൾക്ക് നേരെ ഇറാനും ഡ്രോൺ-മിസൈൽ ആക്രമണങ്ങൾ ആരംഭിച്ചതോടെ മേഖലയിൽ യുദ്ധഭീതി വർദ്ധിച്ചിട്ടുണ്ട്.
Story Summary
Iranian Foreign Minister Abbas Araghchi revealed that he questioned US envoy Steve Witkoff during tense talks about whether he had ever negotiated under the constant threat of being bombed. Rejecting any surrender to US military pressure, Araghchi asserted “Iran is not Venezuela” amid escalating conflicts that broke the Washington-Tehran ceasefire.
