ടെഹ്റാൻ: ഇറാനിയൻ തുറമുഖങ്ങൾക്കു മേൽ അമേരിക്ക തുടരുന്ന നാവിക ഉപരോധത്തിൽ പ്രതിഷേധിച്ച് ഹോർമുസ് കടലിടുക്കിന്റെ നിയന്ത്രണം ‘പഴയ നിലയിലേക്ക്’ മാറ്റിയതായി ഇറാൻ പ്രഖ്യാപിച്ചു. കടലിടുക്കിന്മേൽ കടുത്ത നിയന്ത്രണങ്ങൾ ഏർപ്പെടുത്തുന്നതിലേക്കാണ് ഈ നീക്കം വിരൽചൂണ്ടുന്നത്.(Iran says it has closed the strait of Hormuz again due to US blockade)
ഇറാനിയൻ മാധ്യമങ്ങൾ പുറത്തുവിട്ട സൈനിക കമാൻഡിന്റെ പ്രസ്താവനയിൽ അമേരിക്കയുടെ ഉപരോധത്തെ ‘കടൽക്കൊള്ള’ എന്നാണ് വിശേഷിപ്പിച്ചത്. “അമേരിക്കയുടെ നടപടികൾ കാരണം ഹോർമുസ് കടലിടുക്കിന്റെ നിയന്ത്രണം പഴയ നിലയിലേക്ക് തിരിച്ചുകൊണ്ടുവന്നു. ഈ തന്ത്രപ്രധാനമായ ജലപാത ഇപ്പോൾ സായുധ സേനയുടെ കർശനമായ മേൽനോട്ടത്തിലും നിയന്ത്രണത്തിലുമാണ്,” എന്നാണ് ഇതിൽ പറയുന്നത്.
ഇറാനിൽ നിന്നുള്ളതോ ഇറാനിലേക്കുള്ളതോ ആയ കപ്പലുകളുടെ സഞ്ചാര സ്വാതന്ത്ര്യം അമേരിക്ക പൂർണ്ണമായും പുനഃസ്ഥാപിക്കുന്നത് വരെ ഈ കർശന നിയന്ത്രണം തുടരുമെന്ന് ഇറാൻ വ്യക്തമാക്കി. കടലിടുക്ക് വീണ്ടും തുറന്നുകൊടുത്തതായി കഴിഞ്ഞ ദിവസം ഇറാനും ഡൊണാൾഡ് ട്രംപും പ്രഖ്യാപിച്ചിരുന്നു. എന്നാൽ, ഇറാന്റെ ആണവ പദ്ധതിയടക്കമുള്ള കാര്യങ്ങളിൽ ധാരണയാകുന്നത് വരെ തങ്ങളുടെ ഉപരോധം തുടരുമെന്ന് ട്രംപ് ആവർത്തിച്ചിരുന്നു. ഇതിന് പിന്നാലെയാണ് നിയന്ത്രണം കടുപ്പിക്കാനുള്ള ഇറാന്റെ പുതിയ തീരുമാനം. യുദ്ധത്തിന് മുമ്പ് ലോകത്തെ എണ്ണ വിതരണത്തിൽ വലിയ പങ്കുവഹിച്ചിരുന്ന ഈ ജലപാതയിലെ പുതിയ മാറ്റങ്ങൾ ആഗോള ഊർജ്ജ വിപണിയെയും അന്താരാഷ്ട്ര ബന്ധങ്ങളെയും വീണ്ടും സമ്മർദ്ദത്തിലാക്കിയിരിക്കുകയാണ്.
