മുംബൈ: പ്രസവത്തിന് ശേഷം താൻ അനുഭവിച്ച കടുത്ത മാനസിക പ്രയാസങ്ങളെക്കുറിച്ചും പോസ്റ്റ്പാർട്ടം ഡിപ്രഷനെക്കുറിച്ചും വെളിപ്പെടുത്തി നടി സമീറ റെഡ്ഡി (Sameera Reddy Postpartum Depression). 37-ാം വയസ്സിൽ ആദ്യത്തെ കുഞ്ഞ് പിറന്നതിന് പിന്നാലെയാണ് താൻ ഈ അവസ്ഥയിലൂടെ കടന്നുപോയതെന്ന് താരം പറഞ്ഞു. പ്രായം വെളിപ്പെടുത്തുന്നതിലോ വൈകി വിവാഹം കഴിച്ചതിലോ തനിക്ക് യാതൊരു മടിയുമില്ലെന്നും സമീറ കൂട്ടിച്ചേർത്തു.
പോസ്റ്റ്പാർട്ടം ഡിപ്രഷനെക്കുറിച്ച് തനിക്ക് അറിവില്ലായിരുന്നുവെന്ന് താരം പറയുന്നു. പ്രസവശേഷം ശരീരം പഴയ രീതിയിലേക്ക് മാറാത്തതും ജോലിയിലേക്ക് മടങ്ങാൻ കഴിയാത്തതും തന്നെ തളർത്തി. മറ്റുള്ളവരിൽ നിന്ന് ഉൾവലിയാനും ആരോടും സംസാരിക്കാൻ കഴിയാത്ത അവസ്ഥയിലേക്കും ഇത് തന്നെ എത്തിച്ചു.
ഭർത്താവും അമ്മായിയമ്മയും വലിയ പിന്തുണ നൽകിയിട്ടും മനസ്സിനെ നിയന്ത്രിക്കുന്ന നെഗറ്റീവ് ചിന്തകളിൽ നിന്ന് മുക്തി നേടാൻ കഴിഞ്ഞില്ല. ഭർത്താവിനോട് പോലും സംസാരിക്കാൻ കഴിയാത്ത വിധം മാനസികമായി തളർന്നുപോയ ഒരു വർഷത്തെക്കുറിച്ചാണ് താരം പങ്കുവെച്ചത്.
ഒരു സുഹൃത്താണ് ഇത് പ്രസവാനന്തര വിഷാദമാണെന്ന് തിരിച്ചറിയാൻ സഹായിച്ചത്. തുടർന്ന് തെറാപ്പി ആരംഭിച്ചു. ആറ് മാസത്തെ ചികിത്സയ്ക്ക് ശേഷം മാറ്റം കണ്ടുതുടങ്ങിയെന്നും ഒരു വർഷമെടുത്താണ് പൂർണ്ണമായും സാധാരണ ജീവിതത്തിലേക്ക് മടങ്ങിയെത്തിയതെന്നും താരം വ്യക്തമാക്കി.
“എനിക്ക് ഇപ്പോൾ 47 വയസ്സുണ്ട്. 37-ാം വയസ്സിൽ മകനും 41-ാം വയസ്സിൽ മകളും പിറന്നു. വൈകി വിവാഹം കഴിച്ചതിലോ കുട്ടികളുണ്ടായതിലോ എനിക്ക് വിഷമമില്ല. എന്റെ പ്രായം ഉറക്കെ പറയുന്നതിൽ ഞാൻ സന്തോഷിക്കുന്നു. മനോഹരമായ ഒരു ജീവിതമാണ് ഞാൻ ഇപ്പോൾ നയിക്കുന്നത്,” സമീറ റെഡ്ഡി പറഞ്ഞു.
Story Summary: Actress Sameera Reddy shared her journey through postpartum depression after her first pregnancy at age 37. She highlighted the importance of therapy and spoke candidly about embracing her age (47) and late motherhood without any inhibitions.
