മുംബൈ: ചിത്രീകരണത്തിനിടെ പരുക്കേറ്റതിനെ തുടർന്ന് വിശ്രമത്തിലായ നടി രശ്മിക മന്ദാന തന്റെ ആരോഗ്യനിലയെക്കുറിച്ച് തുറന്നുപറഞ്ഞു. വലത് ഇടുപ്പിലെ ഒരു ടെൻഡൻ വേർപെട്ടതിനെ തുടർന്ന് ശസ്ത്രക്രിയ നടത്തേണ്ടിവന്നുവെന്നും, ഡോക്ടർമാർ ആറാഴ്ചത്തെ വിശ്രമമാണ് നിർദേശിച്ചിരിക്കുന്നതെന്നും രശ്മിക അറിയിച്ചു (Rashmika Mandanna Hip Tendon Injury).
ഇൻസ്റ്റഗ്രാമിൽ പങ്കുവെച്ച കുറിപ്പിലൂടെയാണ് താരത്തിന്റെ പ്രതികരണം. ‘മൈസ’ എന്ന ചിത്രത്തിന്റെ ഡാൻസ് രംഗത്തിന്റെ ചിത്രീകരണത്തിനിടെയാണ് പരുക്കേറ്റതെന്ന് രശ്മിക വ്യക്തമാക്കി. ഇടുപ്പിനെ കാലുകളുമായി ബന്ധിപ്പിക്കുന്ന ടെൻഡനുകളിൽ ഒന്നാണ് വലതുവശത്ത് വേർപെട്ടതെന്നും, വീണ്ടും സാധാരണ രീതിയിൽ കാലുകൾ ചലിപ്പിക്കാൻ അത് ശസ്ത്രക്രിയയിലൂടെ പുനഃസ്ഥാപിക്കേണ്ടിവന്നുവെന്നും അവർ വിശദീകരിച്ചു.
“പരുക്കുകൾ എനിക്ക് വെറുപ്പാണ്. ഇക്കാര്യം ആരും അറിയരുതെന്നാണ് ഞാൻ ആഗ്രഹിച്ചത്. എന്നാൽ അത് സാധിച്ചില്ല. കുറച്ചുനാളായി മാറിനിൽക്കുകയിരുന്നു. ഇത് തുടർച്ചയായി മൂന്നാം തവണയാണ് എനിക്ക് പരുക്കേൽക്കുന്നത്. എന്റെ ശരീരത്തെ ഒരു യന്ത്രം പോലെയല്ല, മനുഷ്യശരീരം പോലെയാണ് ഇനി കാണേണ്ടതെന്ന് മനസ്സിലാകുന്നു,” രശ്മിക കുറിച്ചു. ‘മൈസ’യ്ക്കായി ചിത്രീകരിച്ച ഡാൻസ് രംഗത്തിനിടെയാണ് പരുക്ക് സംഭവിച്ചതെന്നും, താൻ ഇതുവരെ ചെയ്തതിൽ ഏറ്റവും തീവ്രമായ സിനിമകളിലൊന്നായിരിക്കും ഇതെന്നും താരം പറഞ്ഞു. പരുക്ക് വേദനിപ്പിക്കുന്നുണ്ടെങ്കിലും അസഹനീയമായ അവസ്ഥയില്ലെന്നും ആശങ്കപ്പെടേണ്ടതില്ലെന്നും രശ്മിക ആരാധകരെ അറിയിച്ചു.
“എനിക്ക് സ്വയം ഇടവേള എടുക്കാൻ കഴിയില്ലെന്ന് ദൈവത്തിന് അറിയാം. അതിനാൽ എനിക്കുവേണ്ടി ദൈവം തന്നെ ഈ വിശ്രമം നിർബന്ധമാക്കിയതുപോലെയാണ് തോന്നുന്നത്,” എന്നായിരുന്നു രശ്മികയുടെ പ്രതികരണം. നിർബന്ധിത വിശ്രമമാണെങ്കിലും അതിൽ പരാതിയില്ലെന്നും ഈ സമയം പസിലുകൾ ചെയ്ത് ചെലവഴിക്കുന്നുണ്ടെന്നും അവർ പറഞ്ഞു. സാധാരണ ദിവസങ്ങളിൽ ഏറെ സജീവമായി ഓടുകയും വ്യായാമം ചെയ്യുകയും ചെയ്യുന്ന തനിക്ക് അടുത്ത കുറച്ചുനാളത്തേക്ക് അതൊന്നും ചെയ്യാൻ കഴിയില്ലെന്നും രശ്മിക തമാശരൂപേണ പറഞ്ഞു. “വ്യായാമം ചെയ്യാൻ കഴിയുന്നില്ലെങ്കിൽ പിന്നെ എന്ത് ചെയ്യും? ഞാൻ ഭക്ഷണം കഴിക്കും; മധുരം ഇഷ്ടപ്പെടുന്ന ഒരാളായി മാറും,” എന്നും താരം കുറിപ്പിൽ കൂട്ടിച്ചേർത്തു.
ആരാധകർ ആശങ്കപ്പെടേണ്ടതില്ലെന്നും ആരോഗ്യനിലയിൽ മാറ്റങ്ങളുണ്ടെങ്കിൽ അറിയിക്കുമെന്നും പറഞ്ഞ രശ്മിക, എല്ലാവർക്കും സ്നേഹവും നന്ദിയും അറിയിച്ചാണ് കുറിപ്പ് അവസാനിപ്പിച്ചത്. പരുക്കിൽ നിന്ന് പൂർണമായി സുഖം പ്രാപിച്ച ശേഷം വീണ്ടും ചിത്രീകരണത്തിലേക്ക് മടങ്ങുമെന്നാണ് പ്രതീക്ഷിക്കുന്നത്.
Summary: Actor Rashmika Mandanna has revealed that a tendon in her right hip was torn during the shooting of a dance sequence for Mysa. She underwent treatment and has been advised to take six weeks of rest, but reassured fans that the pain is manageable and there is no need to worry.
