ചിലരുടെ മോശം പ്രവണതകൾ കാരണം ഇന്ന് സമൂഹമാധ്യമങ്ങളിൽ ഏറെ തെറ്റിദ്ധരിക്കപ്പെട്ട ഒന്നാണ് ഇൻസ്റ്റാഗ്രാമിലെ സബ്സ്ക്രിപ്ഷൻ ഫീച്ചർ (Manju Pathrose subscription). ഇപ്പോഴിതാ താനും ഇൻസ്റ്റാഗ്രാമിൽ സബ്സ്ക്രിപ്ഷൻ ആരംഭിക്കുകയാണെന്ന വിവരവുമായി രംഗത്തെത്തിയിരിക്കുകയാണ് ജനപ്രിയ നടി മഞ്ജു പത്രോസ്. എന്നാൽ, തെറ്റായ പ്രതീക്ഷകളോടെ ആരും പണം നൽകി തന്റെ അക്കൗണ്ട് സബ്സ്ക്രൈബ് ചെയ്യേണ്ടതില്ലെന്ന് താരം മുൻകൂട്ടി വ്യക്തമാക്കുന്നു.
ഒരു ടെലിവിഷൻ പരിപാടിയുടെ ഷൂട്ടിംഗ് ലൊക്കേഷനിൽ വെച്ച് പങ്കുവെച്ച വീഡിയോയിലൂടെയാണ് മഞ്ജു ഇക്കാര്യം ആരാധകരെ അറിയിച്ചത്. സബ്സ്ക്രിപ്ഷൻ പ്ലാറ്റ്ഫോമുകൾ വഴി ചിലർ നടത്തുന്ന മോശം കാര്യങ്ങൾ കാരണം ഇത് തുറന്നുപറയാൻ തനിക്ക് ചെറിയൊരു മടിയും ചമ്മലുമുണ്ടായിരുന്നുവെന്നും മഞ്ജു പറയുന്നു.
ഇൻസ്റ്റാഗ്രാം സബ്സ്ക്രിപ്ഷൻ ഫീച്ചറിനെക്കുറിച്ച് മഞ്ജുവിന്റെ വാക്കുകൾ ഇങ്ങനെ:
“സത്യത്തിൽ ഇത് പറയാൻ എനിക്ക് നല്ല ചമ്മലുണ്ട്. കാരണം ഈ സബ്സ്ക്രിപ്ഷൻ എന്ന സംഭവം ചിലർ ഭയങ്കരമായി ദുരുപയോഗം ചെയ്തിട്ട്, ഇപ്പോൾ പുറത്തു പറയാൻ പറ്റാത്ത ഒരു അവസ്ഥയായി മാറിയിട്ടുണ്ട്. വളരെ കുറച്ചുപേർ കാണിക്കുന്ന തോന്ന്യാസങ്ങൾ കാരണം, നല്ല രീതിയിൽ ഉപയോഗിക്കാൻ കഴിയുന്ന ഒരു പ്ലാറ്റ്ഫോം ആകെ മോശമായിരിക്കുകയാണ്. അതുകൊണ്ട് തന്നെ ഞാൻ എന്തോ മോശം കാര്യത്തിലേക്ക് ഇറങ്ങിത്തിരിക്കുകയാണോ എന്ന് എനിക്ക് തന്നെ തോന്നിപ്പോയി.”
തെറ്റായ താല്പര്യങ്ങളോടെ ആരും വരേണ്ടതില്ലെന്ന് മഞ്ജു കൃത്യമായി ഓർമ്മിപ്പിക്കുന്നുണ്ട്.തന്റെ ജീവിതത്തിലെ ചെറിയ ചെറിയ യാത്രകളും അനുഭവങ്ങളും പങ്കുവെക്കാനാണ് ഈ പ്ലാറ്റ്ഫോം ഉപയോഗിക്കുക.മഞ്ജുവിനെ സന്തോഷിപ്പിക്കുന്നതും വിഷമിപ്പിക്കുന്നതുമായ വ്യക്തിപരമായ കാര്യങ്ങൾ ഇതിലൂടെ ഷെയർ ചെയ്യും.ചില പ്രധാനപ്പെട്ട വിഷയങ്ങളിൽ സബ്സ്ക്രൈബ് ചെയ്തവരുമായി ലൈവിലൂടെയും വീഡിയോകളിലൂടെയും സംവദിക്കും.
“നിങ്ങൾ പ്രതീക്ഷിക്കുന്ന തരത്തിലുള്ള ‘ത്രസിപ്പിക്കുന്ന’ രംഗങ്ങളൊന്നും ഇതിൽ ഉണ്ടാകില്ല. അങ്ങനെയുള്ള താല്പര്യമുള്ളവർ സബ്സ്ക്രൈബ് ചെയ്യേണ്ടതില്ല. രണ്ടുപേരായാലും അഞ്ചുപേരായാലും ഞാൻ അവർക്കായി നല്ല ഉള്ളടക്കം നൽകും,” മഞ്ജു വ്യക്തമാക്കി. വരും ദിവസങ്ങളിൽ തന്നെ ഇതിലൂടെ വീഡിയോകൾ പങ്കുവെച്ചു തുടങ്ങുമെന്നും താരം കൂട്ടിച്ചേർത്തു.
Story Summary: Malayalam actress Manju Pathrose has announced the launch of her Instagram subscription feature. In a video, she expressed her initial hesitation due to the misuse of this platform by a few, and strictly advised users not to subscribe expecting any explicit content.
