മുംബൈ: മകൾ നൈസയുമായുള്ള ആത്മബന്ധത്തെക്കുറിച്ചും കൗമാരപ്രായത്തിൽ തങ്ങൾക്കിടയിലുണ്ടായ തർക്കങ്ങളെക്കുറിച്ചും മനസ്സ് തുറന്ന് ബോളിവുഡ് താരം കാജോൾ (Kajol- Nysa Devgan). പ്രശസ്ത യൂട്യൂബർ ലില്ലി സിംഗുമായുള്ള അഭിമുഖത്തിലാണ് താരം തന്റെ മാതൃത്വത്തിലെ വെല്ലുവിളികളെക്കുറിച്ച് സംസാരിച്ചത്.
നൈസയ്ക്ക് 12 വയസ്സുള്ളപ്പോൾ ഹോർമോൺ വ്യതിയാനങ്ങളുടെ ഘട്ടമായിരുന്നുവെന്നും ആ സമയത്ത് തങ്ങൾക്കിടയിലുള്ള ബന്ധം ഏറെ വഷളായെന്നും കാജോൾ വെളിപ്പെടുത്തി. “ഏകദേശം മൂന്ന് വർഷത്തോളം ഞങ്ങൾ വലിയ വഴക്കിലായിരുന്നു. രണ്ടുപേരും ഒരുപോലെ വാശി പിടിക്കുകയും യുക്തിയില്ലാതെ വഴക്കിടുകയും ചെയ്യുമായിരുന്നു. പരസ്പരം സംസാരിക്കാനോ കേൾക്കാനോ തയ്യാറാവാത്ത അവസ്ഥയായിരുന്നു അന്ന്,” താരം പറഞ്ഞു.
ഒരു ഘട്ടത്തിൽ താൻ കൂടുതൽ പക്വത കാണിക്കണമെന്നും വാശി കുറയ്ക്കണമെന്നും തീരുമാനിച്ചതായി കാജോൾ പറയുന്നു. മകൾ പറയുന്നത് ക്ഷമയോടെ കേൾക്കാൻ തയ്യാറായതാണ് മാറ്റങ്ങൾക്ക് തുടക്കമിട്ടത്. “മക്കളെ വളർത്തുന്ന കാര്യത്തിൽ ഞാൻ പഠിച്ച വലിയ പാഠം അവർ പറയുന്നത് കേൾക്കുക എന്നതാണ്. മകളുമായുള്ള ഇന്നത്തെ സൗഹൃദം ഏറെ പരിശ്രമിച്ച് കെട്ടിപ്പടുത്തതാണ്,” കാജോൾ വ്യക്തമാക്കി.
പെൺകുട്ടികളുടെ ജീവിതത്തിലെ സങ്കീർണ്ണതകളെക്കുറിച്ച് താൻ മകളോട് ചോദിച്ചറിയാറുണ്ടെന്നും അവൾക്ക് കൃത്യമായ മാർഗനിർദ്ദേശങ്ങൾ നൽകാറുണ്ടെന്നും താരം കൂട്ടിച്ചേർത്തു. 2003-ലാണ് കാജോളിനും അജയ് ദേവ്ഗണും മകൾ നൈസ ജനിക്കുന്നത്.
Story Summary: Bollywood actress Kajol opened up about her challenging relationship with daughter Nysa during her teenage years. In an interview with Lilly Singh, Kajol revealed they had intense arguments for nearly three years without proper communication. She emphasized that learning to listen patiently was the key to rebuilding their bond.
