ന്യൂഡൽഹി: നീറ്റ് ചോദ്യപേപ്പർ ചോർച്ചയ്ക്കെതിരെയുള്ള വിദ്യാർത്ഥി പ്രക്ഷോഭത്തിനിടെ നൃത്തം ചെയ്തതിന്റെ പേരിൽ തനിക്കെതിരെ പോസ്റ്റിട്ട ഛത്തീസ്ഗഢ് ബി.ജെ.പി ഘടകത്തിന് കിടിലൻ പവർപോയിന്റ് പ്രസന്റേഷൻ മറുപടിയുമായി സോഷ്യൽ മീഡിയ ഇൻഫ്ലുവൻസറും വിദ്യാർത്ഥിനിയുമായ ഉർവശി പലാന്ദുർക്കർ. തൻ്റെ വീഡിയോ അനുമതിയില്ലാതെ ദുരുപയോഗം ചെയ്ത ബി.ജെ.പിയ്ക്ക് ഉർവശി നൽകിയ പരിഹാസഭരിതമായ മറുപടി നിലവിൽ സോഷ്യൽ മീഡിയയിൽ തരംഗമായി മാറിക്കഴിഞ്ഞു.(Gen Z Student Urwashi Responds To BJP NEET Protest Post)
സംസ്ഥാനത്തെ അഭിമാനകരമായ നേട്ടം കൈവരിച്ച വിദ്യാർത്ഥിയെയും, സമരത്തിനിടെ നൃത്തം ചെയ്യുന്ന വിദ്യാർത്ഥികളെയും താരതമ്യം ചെയ്തുകൊണ്ടായിരുന്നു ബി.ജെ.പി പോസ്റ്റ് പങ്കുവെച്ചിരുന്നത്. “ബാബറുടെ പാരമ്പര്യത്തിന് മുന്നിൽ തുള്ളുന്നവർ” എന്ന് വിദ്യാർത്ഥികളെ പരിഹസിച്ച ബി.ജെ.പി, “ഏത് ജെൻ സി മനോഭാവമാണ് നിങ്ങൾ തിരഞ്ഞെടുക്കുക?” എന്നും ചോദിച്ചിരുന്നു.
ബി.ജെ.പിയുടെ ഈ ട്രോൾ വീഡിയോയോട് വളരെ ലളിതമായും പരിഹാസത്തോടെയും പ്രതികരിച്ച ഉർവശി, തൻ്റെ നിലപാടുകൾ ഒരു പവർപോയിന്റ് പ്രസന്റേഷനിലൂടെയാണ് അവതരിപ്പിച്ചത്. “നിങ്ങളുടെ പോസ്റ്റിന്റെ ക്യാപ്ഷൻ വളരെ മോശമാണ്. നിങ്ങളുടെ ചാറ്റ് ജി.പി.ടി കൃത്യമായ മറുപടികളല്ല നൽകുന്നത്. ‘ബാബറുടെ പാരമ്പര്യം’ എന്ന പ്രയോഗം തീർത്തും അനുയോജ്യമല്ല. ‘ജെൻ സി’ പദങ്ങൾ പാർലമെന്റിനെപ്പോലും പഠിപ്പിച്ച ഒരു തലമുറയിൽ 2026-ൽ ഇനി ‘ഭിന്നിപ്പിച്ചു ഭരിക്കൽ’ രാഷ്ട്രീയം നടപ്പിലാക്കാൻ കഴിയില്ല,” ഉർവശി പലാന്ദുർക്കർ പറഞ്ഞു.
പഠനവും കലാ-കായിക വിനോദങ്ങളും ഒന്നിച്ച് കൊണ്ടുപോകാൻ കഴിയുമെന്ന് വ്യക്തമാക്കിയ ഉർവശി, തനിക്ക് പത്താം ക്ലാസിലും പന്ത്രണ്ടാം ക്ലാസിലും 93 ശതമാനം മാർക്കുണ്ടെന്ന് ചൂണ്ടിക്കാട്ടി. നൃത്തത്തോടൊപ്പം താൻ പഠനത്തിലും മിടുക്കിയാണെന്നതിന്റെ തെളിവുകളും വീഡിയോയിലൂടെ അവർ പങ്കുവെച്ചു. ഉർവശിയുടെ പോസിറ്റീവ് നിലപാടിനെയും മൂർച്ചയുള്ള മറുപടിയെയും പുകഴ്ത്തി നിരവധി പ്രമുഖർ രംഗത്തെത്തി. കോൺഗ്രസ് നേതാവ് രാഹുൽ ഗാന്ധി ഈ വീഡിയോ തൻ്റെ ഇൻസ്റ്റാഗ്രാം സ്റ്റോറിയായി പങ്കുവെച്ചു.
ആം ആദ്മി പാർട്ടി നേതാവ് അരവിന്ദ് കെജ്രിവാൾ, “നിന്റെ പോസിറ്റിവിറ്റി എനിക്ക് വളരെ ഇഷ്ടപ്പെട്ടു, ദൈവം അനുഗ്രഹിക്കട്ടെ മോളേ” എന്ന് കമന്റ് ചെയ്തപ്പോൾ, കോക്ക്റോച്ച് ജനതാ പാർട്ടിയും പിന്തുണയുമായി രംഗത്തെത്തി. വിദ്യാഭ്യാസ മന്ത്രി ധർമേന്ദ്ര പ്രധാന്റെ രാജിയെ തുടർന്ന് സമരം നിർത്തിവെച്ചെങ്കിലും, വിദ്യാർത്ഥികൾക്കെതിരായ പോലീസ് നടപടി തുടർന്നാൽ ശക്തമായ പ്രക്ഷോഭവുമായി മുന്നോട്ടുപോകുമെന്ന് സി ജെ പി വ്യക്തമാക്കിയിരുന്നു.
Story Summary
Student protester Urwashi Palandurkar responded with a witty PowerPoint presentation to Chhattisgarh BJP after they used her NEET protest video without permission to mock ‘Gen Z’ protesters. Her light-hearted counter-video went viral, garnering widespread praise online, including support from Rahul Gandhi, Arvind Kejriwal, and CJP’s Abhijeet Dipke.
