കൊച്ചി: മലയാള സിനിമയിൽ എക്കാലത്തെയും വലിയ ജനപ്രിയ ഹിറ്റുകൾ സമ്മാനിച്ച മാസ്റ്റർ ഡയറക്ടറാണ് പ്രിയദർശൻ. പ്രത്യേകിച്ച് മോഹൻലാൽ-പ്രിയദർശൻ കൂട്ടുകെട്ടിൽ പിറന്ന ചിത്രങ്ങളെല്ലാം മലയാളി പ്രേക്ഷകർ നെഞ്ചിലേറ്റിയവയാണ് (Director Priyadarshan interview ). എന്നാൽ, താൻ തിയേറ്ററുകളിൽ വലിയ വിജയം നേടുമെന്ന് ഉറച്ചുവിശ്വസിച്ച ചില ചിത്രങ്ങൾ പരാജയപ്പെട്ടുവെന്നും, അതേസമയം തനിക്ക് ഒട്ടും ആത്മവിശ്വാസം ഇല്ലാതിരുന്ന സിനിമകൾ ഇൻഡസ്ട്രി ഹിറ്റുകളായി മാറിയെന്നും തുറന്നു പറയുകയാണ് പ്രിയദർശൻ. ക്യു സ്റ്റുഡിയോയ്ക്ക് (Cue Studio) നൽകിയ പ്രത്യേക അഭിമുഖത്തിൽ സംസാരിക്കുകയായിരുന്നു അദ്ദേഹം.
“ഞാൻ ഒരു സിനിമയും മുൻകൂട്ടി പ്ലാൻ ചെയ്ത് ചെയ്യാറില്ല, അതെല്ലാം സംഭവിച്ചു പോകുന്നതാണ്. അത് മറ്റൊരു ഭാഷയിലെ റീമേക്ക് ആണോ അതോ ഒറിജിനൽ കഥയാണോ എന്ന് ഞാൻ അധികം ആലോചിക്കാറില്ല. എനിക്ക് വ്യക്തിപരമായി ഇഷ്ടപ്പെടുന്ന ഒരു കഥ സിനിമയാക്കുന്നു എന്ന് മാത്രം. എനിക്ക് തിയേറ്ററിൽ ഏറ്റവും കൂടുതൽ കോൺഫിഡൻസ് ഉണ്ടായിരുന്ന ‘മിഥുനം’, ‘മുകുന്ദേട്ടാ സുമിത്ര വിളിക്കുന്നു’ പോലെയുള്ള സിനിമകൾ ബോക്സ് ഓഫീസിൽ വിചാരിച്ചത്ര ഓടിയില്ല. പക്ഷേ, ഞാൻ തിയേറ്ററിൽ വർക്കാകുമോ എന്ന് ഏറ്റവും കൂടുതൽ സംശയിച്ചെടുത്ത സിനിമയാണ് ‘തേന്മാവിൻ കൊമ്പത്ത്’. അത് റിലീസായപ്പോൾ വലിയ രീതിയിൽ വർക്കായി. അതുകൊണ്ട് സിനിമയിൽ ഏത് ഘടകമാണ് വർക്ക് ആകുക ഇല്ല എന്ന് കൃത്യമായി പറയാൻ എനിക്ക് ഇന്നും അറിയില്ല,” പ്രിയദർശൻ വ്യക്തമാക്കുന്നു.
ദേശീയ പുരസ്കാരം നേടിയ ‘മരക്കാർ: അറബിക്കടലിന്റെ സിംഹം’ ആണ് മോഹൻലാൽ-പ്രിയദർശൻ കൂട്ടുകെട്ടിൽ ഒടുവിൽ പുറത്തിറങ്ങിയ ചിത്രം. അതേസമയം, സിനിമാ ലോകം ഒന്നടങ്കം കാത്തിരിക്കുന്ന പ്രിയദർശന്റെ കരിയറിലെ നൂറാമത്തെ ചിത്രം തന്റെ പ്രിയ സുഹൃത്ത് മോഹൻലാലിനൊപ്പം ചെയ്യാനുള്ള അണിയറ ഒരുക്കങ്ങളിലാണ് അദ്ദേഹം ഇപ്പോൾ.
ബോളിവുഡ് താരം അക്ഷയ് കുമാർ നായകനായ ‘ഭൂത് ബംഗ്ലാ’ (Bhoot Bangla) ആണ് പ്രിയദർശന്റേതായി ഒടുവിൽ പുറത്തിറങ്ങിയ ചിത്രം. വലിയ വിജയമായി മാറിയ ഈ ഹൊറർ-കോമഡി ചിത്രം അക്ഷയ് കുമാർ, ശോഭ കപൂർ, ഏകത കപൂർ എന്നിവർ ചേർന്നാണ് നിർമ്മിച്ചത്. വർഷങ്ങൾക്ക് ശേഷം പ്രിയദർശൻ-അക്ഷയ് കുമാർ കൂട്ടുകെട്ട് വീണ്ടും ഒന്നിച്ച ചിത്രം കൂടിയായിരുന്നു ഇത്.
Story Summary: Renowned director Priyadarshan opened up in an interview with Cue Studio about how box office success remains unpredictable. He revealed that movies he was highly confident about, like Mithunam and Mukundetta Sumitra Vilikkunnu, didn’t perform well, whereas Thenmavin Kombath, which he doubted, became a massive hit. Priyadarshan is currently preparing for his 100th film with Mohanlal, following his recent Bollywood release Bhoot Bangla starring Akshay Kumar.
