ചെന്നൈ: ഗൗതം വാസുദേവ് മേനോൻ സംവിധാനം ചെയ്ത സ്പൈ ആക്ഷൻ ത്രില്ലർ ‘ധ്രുവനച്ചത്തിരം’ റിലീസ് ചെയ്യുന്നതിനായുള്ള തടസ്സങ്ങൾ മദ്രാസ് ഹൈക്കോടതി നീക്കി (Dhruva Natchathiram Release Update). ചിത്രം ജൂൺ 15-ന് മുൻപായി തിയറ്ററുകളിൽ എത്തിക്കണമെന്നാണ് ജസ്റ്റിസ് സെന്തിൽകുമാർ രാമമൂർത്തിയുടെ ഉത്തരവ്. 2016-ൽ ചിത്രീകരണം ആരംഭിച്ച സിനിമ സാമ്പത്തിക പ്രശ്നങ്ങളെത്തുടർന്ന് പലതവണ റിലീസ് മാറ്റിവെച്ചിരുന്നു.
രഹസ്യാന്വേഷണ ഏജന്റായ ‘ജോൺ’ എന്ന കഥാപാത്രത്തെയാണ് വിക്രം ഈ ചിത്രത്തിൽ അവതരിപ്പിക്കുന്നത്. ഹാരിസ് ജയരാജ് ഒരുക്കിയ ചിത്രത്തിലെ ഗാനങ്ങളും ട്രെയിലറും നേരത്തെ തന്നെ തരംഗമായിരുന്നു. വിക്രമിനൊപ്പം വില്ലൻ വേഷത്തിൽ വിനായകൻ എത്തുന്നു എന്ന പ്രത്യേകതയും ഈ സിനിമയ്ക്കുണ്ട്.
ഋതു വർമ്മ, സിമ്രാൻ, ആർ. പാർത്ഥിപൻ, രാധിക ശരത്കുമാർ, ദിവ്യദർശിനി തുടങ്ങിയ വൻ താരനിര തന്നെ ചിത്രത്തിലുണ്ട്. മമ്മൂട്ടി ചിത്രം ‘ഡൊമിനിക് ആൻഡ് ദ് ലേഡീസ് പേഴ്സിന്’ ശേഷം ഗൗതം മേനോൻ സംവിധാനം ചെയ്യുന്ന ചിത്രമാണിത്. ‘വീര ധീര സൂരൻ’ എന്ന ചിത്രത്തിന്റെ വിജയത്തിന് ശേഷം വിക്രമിന്റേതായി എത്തുന്ന ബിഗ് ബജറ്റ് ചിത്രമായിരിക്കും ഇത്.
കോടതി ഉത്തരവ് വന്നതോടെ ചിത്രത്തിന്റെ ഔദ്യോഗിക റിലീസ് തീയതി നിർമ്മാതാക്കൾ ഉടൻ പ്രഖ്യാപിക്കുമെന്നാണ് റിപ്പോർട്ടുകൾ. വർഷങ്ങൾ നീണ്ട കാത്തിരിപ്പിന് വിരാമമാകുന്നതിന്റെ ആവേശത്തിലാണ് തമിഴ് സിനിമാ പ്രേമികൾ.
Story Summary: The Madras High Court has cleared the path for the release of Chiyaan Vikram’s long-delayed film ‘Dhruva Natchathiram.’ Justice Senthilkumar Ramamoorthy ordered that the film be released by June 15, 2026. Directed by Gautham Vasudev Menon, the spy thriller features Vikram as a secret agent named John. The film also stars Vinayakan, Ritu Varma, and Simran in pivotal roles.
