മുംബൈ: തന്റെ കരിയറിലെ ഒരു മോശം ഘട്ടത്തിൽ പുതിയ തലമുറ തന്നെ പൂർണ്ണമായും മറന്നുപോയതായി തോന്നിയിരുന്നെന്ന് ബോളിവുഡ് താരം ബോബി ഡിയോൾ ( Bobby Deol). ഈ ചിന്തയാണ് സൽമാൻ ഖാൻ കേന്ദ്രകഥാപാത്രമായി എത്തിയ ‘റേസ് 3’ എന്ന ചിത്രത്തിന്റെ ഭാഗമാകാൻ തന്നെ പ്രേരിപ്പിച്ചതെന്നും താരം വെളിപ്പെടുത്തി. ശേഖർ സുമൻ അവതരിപ്പിക്കുന്ന ‘ശേഖർ ടുനൈറ്റ്’ എന്ന പരിപാടിയിൽ സംസാരിക്കുകയായിരുന്നു അദ്ദേഹം.
വർഷങ്ങൾക്ക് മുൻപ് സൽമാൻ ഖാൻ തന്നെ ഫോണിൽ വിളിച്ച് ചിത്രത്തിലേക്ക് ക്ഷണിച്ച അനുഭവം ബോബി ഡിയോൾ പങ്കുവെച്ചു. “സൽമാൻ എന്നെ ഫോണിൽ വിളിച്ച് ‘ഷർട്ട് ഊരുമോ മാമു’ എന്ന് ചോദിച്ചു. സിനിമയ്ക്കായി ഞാൻ എന്തും ചെയ്യാൻ തയ്യാറാണെന്ന് ഞാൻ മറുപടി നൽകി. സൽമാൻ ഖാൻ ചിത്രങ്ങൾ ദശലക്ഷക്കണക്കിന് ആളുകളാണ് തിയേറ്ററുകളിൽ കാണുന്നത്. അക്കാലത്ത് യുവതലമുറ ബോബി ഡിയോൾ എന്ന നടനെ മറന്നുതുടങ്ങിയിരുന്നു. അതുകൊണ്ട് ഈ വലിയ സിനിമയുടെ ഭാഗമായാൽ ജനങ്ങൾ വീണ്ടും എന്നെ തിരിച്ചറിയുമെന്ന് ഞാൻ കരുതി,” ബോബി ഡിയോൾ പറഞ്ഞു. 2018-ൽ പുറത്തിറങ്ങിയ ‘റേസ് 3’ക്ക് ശേഷം ബോബി ഡിയോളിന്റെ കരിയർ മാറിമറിയുകയായിരുന്നു. പ്രകാശ് ഝായുടെ ‘ആശ്രമം’ എന്ന വെബ് സീരീസിലെ പ്രകടനം വലിയ പ്രശംസ നേടി. തുടർന്ന് സന്ദീപ് റെഡ്ഡി വംഗയുടെ ‘അനിമൽ’ എന്ന ചിത്രത്തിലെ വില്ലൻ വേഷം താരത്തിന്റെ കരിയറിലെ ഏറ്റവും വലിയ വഴിത്തിരിവായി മാറി. ഇതിന് ശേഷം ‘ഹരി ഹര വീര മല്ലു’ ഉൾപ്പെടെയുള്ള വമ്പൻ പ്രോജക്റ്റുകളുടെ ഭാഗമായ താരം അനുരാഗ് കശ്യപിന്റെ വരാനിരിക്കുന്ന ‘ബന്ദർ’ എന്ന ചിത്രത്തിലാണ് അടുത്തതായി അഭിനയിക്കുന്നത്.
Summary: Bollywood actor Bobby Deol opened up about a phase in his career when he felt forgotten by the younger generation, which motivated him to accept a role in Salman Khan’s 2018 film ‘Race 3’. Speaking on the talk show Shekhar Tonite, Deol recalled how Salman Khan offered him the film and how he seized the opportunity to re-introduce himself to modern audiences.
