ബോളിവുഡ് നിർമാതാവ് ബോണി കപൂറിന്റെ മകളും നടൻ അർജുൻ കപൂറിന്റെ സഹോദരിയുമായ അൻഷുല കപൂറിന്റെ വിവാഹത്തിന് പിന്നാലെ ഹൃദയസ്പർശിയായ കുറിപ്പുമായി അർജുൻ കപൂർ. മുംബൈയിൽ വെച്ച് നടന്ന സ്വകാര്യ ചടങ്ങിൽ രോഹൻ തക്കറാണ് അൻഷുലയെ വിവാഹം ചെയ്തത്. അൻഷുലയ്ക്കൊപ്പമുള്ള പഴയതും പുതിയതുമായ ചിത്രങ്ങൾ പങ്കുവെച്ചുകൊണ്ടാണ് താരം തന്റെ സ്നേഹം അറിയിച്ചത്. (Anshula Kapoor Wedding)
“എന്റെ അൻഷിനോട്, നീ എന്നും എന്റേതായിരിക്കും, പക്ഷേ ഇപ്പോൾ നിന്നെ ഞാൻ പറഞ്ഞയക്കണം,” എന്ന വൈകാരികമായ വരികളോടെയാണ് അർജുൻ തന്റെ കുറിപ്പ് തുടങ്ങുന്നത്. അൻഷുലയുടെ പുതിയ ജീവിതയാത്രയിൽ തനിക്ക് അതിയായ സന്തോഷമുണ്ടെന്നും, അവളുടെ വളർച്ചയുടെ ഓരോ ഘട്ടത്തിലും താൻ കൂടെയുണ്ടായിരുന്നെന്നും അദ്ദേഹം ഓർമ്മിപ്പിച്ചു. തങ്ങളുടെ മാതാവായ അന്തരിച്ച മോന ഷൂരി കപൂറിന്റെ ഓർമ്മകളും അർജുൻ പങ്കുവെച്ചു. “ഓരോ ചുവടിലും നമ്മുടെ അമ്മയെ പ്രതിനിധീകരിക്കുന്ന അത്ഭുതകരമായ ഒരു സ്ത്രീയായി നീ മാറിയിരിക്കുന്നു. നീ ഒരിക്കലും വിഷമിക്കേണ്ട, കാരണം അവർ മുകളിലിരുന്ന് എപ്പോഴും നിന്നെ കാണുകയും അനുഗ്രഹിക്കുകയും ചെയ്യും,” അർജുൻ കുറിച്ചു.
എപ്പോഴും താൻ കൂടെയുണ്ടാകുമെന്നും അൻഷുലയുടെ മുഖത്തെ പുഞ്ചിരി മായില്ലെന്ന് ഉറപ്പുവരുത്തുമെന്നും വാഗ്ദാനം നൽകിയാണ് അർജുൻ കുറിപ്പ് അവസാനിപ്പിക്കുന്നത്. കഴിഞ്ഞ വർഷം ജൂലൈയിലായിരുന്നു അൻഷുലയുടെയും രോഹന്റെയും വിവാഹനിശ്ചയം നടന്നത്. ബോണി കപൂറിന്റെയും ആദ്യ ഭാര്യ മോന കപൂറിന്റെയും മക്കളാണ് അർജുനും അൻഷുലയും. 2012-ൽ അമ്മയുടെ വിയോഗത്തിന് ശേഷം അർജുൻ തന്റെ സഹോദരിയുടെ സംരക്ഷകനായി എന്നും കൂടെയുണ്ടായിരുന്നു. സഹോദരന്റെ ഈ സ്നേഹനിർഭരമായ വാക്കുകൾ സോഷ്യൽ മീഡിയയിൽ വലിയ രീതിയിലാണ് ശ്രദ്ധനേടുന്നത്.
Summary: Actor Arjun Kapoor shared an emotional note following his sister Anshula Kapoor’s wedding to Rohan Thakkar, expressing his deep love and support. Reflecting on their journey and the memory of their late mother, Mona Shourie Kapoor, Arjun promised to always be by his sister’s side while wishing her happiness in her new chapter of life.
