മുംബൈ: പ്രശസ്ത ടെലിവിഷൻ താരം അദിതി ശർമ്മ ഭർത്താവിനും ഭർതൃവീട്ടുകാർക്കുമെതിരെ ഗാർഹിക പീഡനത്തിനും സാമ്പത്തിക ചൂഷണത്തിനും മുംബൈ പോലീസിൽ പരാതി നൽകി. അദിതിയുടെ പരാതിയിൽ ഭർത്താവ് അഭിനീത് വിദ്യാനന്ദ് കൗശിക്, അമ്മായിയമ്മ ഊർമിള കൗശിക്, ഭർതൃസഹോദരി കീർത്തി കൗശിക് എന്നിവർക്കെതിരെ ഗോരേഗാവ് പോലീസ് കേസെടുത്തു.(Aditi Sharma Files Domestic Violence Case Against Husband And In Laws)
‘റബ്ബ് സേ ഹായ് ദുആ’, ‘കലീരേൻ’ തുടങ്ങിയ പ്രശസ്ത സീരിയലുകളിലൂടെ ശ്രദ്ധേയയായ നടിയാണ് അദിതി. ശാരീരികവും മാനസികവുമായ ഉപദ്രവം, സ്വഭാവഹത്യ, സ്ത്രീധന ചൂഷണം തുടങ്ങി ഗുരുതരമായ ആരോപണങ്ങളാണ് ഇവർക്കെതിരെ ഉന്നയിച്ചിട്ടുള്ളത്. 2021 ജൂണിൽ ഓൺലൈൻ ആക്ടിംഗ് ക്ലാസിലൂടെ പരിചയപ്പെട്ട ഇരുവരും പിന്നീട് പ്രണയത്തിലാവുകയായിരുന്നു. തുടർന്ന് 2024 നവംബറിൽ കുടുംബാംഗങ്ങളുടെ സമ്മതത്തോടെ വിവാഹിതരായി.
വിവാഹം കഴിഞ്ഞ് ഏതാനും ദിവസങ്ങൾക്കുള്ളിൽ തന്നെ ഭർത്താവിന്റെ പെരുമാറ്റത്തിൽ മാറ്റം വന്നതായും, വസ്ത്രധാരണത്തിന്റെ പേരിലും നിസ്സാര കാര്യങ്ങൾക്കും നിരന്തരം വഴക്കിട്ടിരുന്നതായും അദിതി പരാതിയിൽ പറയുന്നു. കുടുംബ ചെലവുകൾ വഹിക്കുന്നതിന് പകരം ഭർത്താവ് തന്റെ കൈയിൽ നിന്ന് പണം വാങ്ങിയിരുന്നു. ഫോൺ പരിശോധിക്കുക, ഫോണിൽ സംസാരിക്കുന്നത് തടയുക, വീട്ടുകാരുമായി ബന്ധപ്പെടാൻ അനുവദിക്കാതിരിക്കുക തുടങ്ങിയ മാനസിക പീഡനങ്ങൾ നേരിടേണ്ടി വന്നു.
തന്റെ സ്വർണ്ണമാല, മോതിരം, വജ്രമോതിരം, മംഗൽസൂത്ര, വളകൾ എന്നിവയടങ്ങുന്ന സ്ത്രീധനാഭരണങ്ങൾ അമ്മായിയമ്മ തട്ടിയെടുത്തെന്നും, പലതവണ ആവശ്യപ്പെട്ടിട്ടും തിരികെ നൽകിയില്ലെന്നും നടി ആരോപിക്കുന്നു. ഭർത്താവിന്റെയും കുടുംബത്തിന്റെയും ഉപദ്രവം അതിരു കടന്നതോടെയാണ് നടി പോലീസിനെ സമീപിച്ചത്. സംഭവം അന്വേഷിച്ചുവരികയാണെന്ന് ഗോരേഗാവ് പോലീസ് വ്യക്തമാക്കി.
Story Summary
Television actress Aditi Sharma has filed a domestic violence and harassment FIR against her husband Abhineet Kaushik and his family at the Goregaon Police Station in Mumbai. She alleged physical and mental abuse, character assassination, and the retention of her bridal jewellery by her in-laws.
