കൊൽക്കത്ത: ഇന്ത്യൻ സൈന്യത്തിന്റെ ഈസ്റ്റേൺ കമാൻഡിന് കീഴിലുള്ള ആർമി ഓർഡിനൻസ് കോർപ്സിലെ കേണൽ റാങ്കിലുള്ള ഉദ്യോഗസ്ഥൻ 50 ലക്ഷം രൂപയുടെ കൈക്കൂലി കേസിൽ കേന്ദ്ര അന്വേഷണ ഏജൻസിയായ സി.ബി.ഐയുടെ പിടിയിലായി. കേണൽ ഹിമാൻഷു ബാലി എന്ന ഉദ്യോഗസ്ഥനെയാണ് സി.ബി.ഐ ചൊവ്വാഴ്ച അറസ്റ്റ് ചെയ്തത്. കാൺപൂർ ആസ്ഥാനമായി പ്രവർത്തിക്കുന്ന ഒരു സ്വകാര്യ കമ്പനിക്ക് വഴിവിട്ട രീതിയിൽ ടെൻഡറുകൾ നൽകിയതിനാണ് അറസ്റ്റ്.(Army Colonel Himanshu Bali Arrested By CBI In Kolkata For Bribery Case)
ചട്ടങ്ങൾ ലംഘിച്ച് ടെൻഡറുകൾ ഒപ്പുവെക്കുക, നിലവാരമില്ലാത്ത സാമ്പിളുകൾക്ക് അനുമതി നൽകുക, കമ്പനിയുടെ തടഞ്ഞുവെച്ചതും തുക കൂട്ടി കാണിച്ചതുമായ ബില്ലുകൾ വേഗത്തിൽ പാസാക്കുക തുടങ്ങിയ ക്രമക്കേടുകളാണ് ഈ ഉദ്യോഗസ്ഥൻ ചെയ്തതെന്നാണ് സി.ബി.ഐ കണ്ടെത്തൽ. സ്വകാര്യ കമ്പനിയുടെ ഡയറക്ടർമാർ സൈന്യത്തിന്റെ പ്രധാന ടെൻഡറുകൾ സ്വന്തമാക്കാൻ കേണലിന് വൻ തുക കൈക്കൂലി നൽകിയതായി സി.ബി.ഐ രജിസ്റ്റർ ചെയ്ത എഫ്.ഐ.ആറിൽ വ്യക്തമാക്കുന്നു. ഈ വർഷം ആദ്യം കമ്പനിക്ക് ലഭിച്ച ഒരു വലിയ കരാറിന് പിന്നിലും ഇത്തരത്തിലുള്ള ഇടപാടുകൾ നടന്നിട്ടുണ്ട്.
കഴിഞ്ഞ ഏപ്രിൽ 22-ന് കൊൽക്കത്തയിലെ പാർക്ക് സ്ട്രീറ്റ് പരിസരത്ത് വെച്ച് കേണൽ ബാലി കമ്പനി പ്രതിനിധികളുമായി കൂടിക്കാഴ്ച നടത്തിയിരുന്നു. ഇതിന് തൊട്ടുപിന്നാലെ ഏപ്രിൽ 24-നാണ് വിവാദമായ ടെൻഡർ ഈ കമ്പനിക്ക് അനുവദിച്ചത്. തുടർന്ന് മെയ് 16-ന് കൈക്കൂലി തുകയുടെ ബാക്കി ഭാഗമായ 50 ലക്ഷം രൂപ കൂടി കേണൽ ആവശ്യപ്പെട്ടതായി സി.ബി.ഐ പറയുന്നു. ഹവാല ഇടപാടിലൂടെയാണ് ഈ പണം കൈമാറാൻ പദ്ധതിയിട്ടിരുന്നത്. കേണലിനും സ്വകാര്യ കരാറുകാരനുമെതിരെ അഴിമതി നിരോധന നിയമപ്രകാരം കേസെടുത്ത ശേഷമാണ് സി.ബി.ഐ അറസ്റ്റ് രേഖപ്പെടുത്തിയത്. കേസിൽ മറ്റ് ചില അജ്ഞാത വ്യക്തികൾക്കും പങ്കുണ്ടെന്നാണ് സൂചന.
Story Summary
A Colonel-rank army officer, Himanshu Bali, has been arrested by the CBI in Kolkata for allegedly accepting a Rs 50 lakh bribe. The officer under the Eastern Command is accused of manipulating tenders and clearing inflated bills for a Kanpur-based private firm.
