കൊച്ചി: മരടിൽ യുവാവിനെ ബലമായി തട്ടിക്കൊണ്ടുപോയ കേസിന് പിന്നിലെ വൻ മയക്കുമരുന്ന് മാഫിയാ ശൃംഖലയെ തകർത്ത് കൊച്ചി സിറ്റി പോലീസ്. ജൂലൈ 29-ന് രാത്രി ഫോറം മാളിന് മുന്നിൽ വെച്ച് സ്കൂട്ടറിൽ സഞ്ചരിക്കുകയായിരുന്ന യുവാവിനെ കാറിലെത്തിയ സംഘം തട്ടിക്കൊണ്ടുപോകുകയായിരുന്നു. നിർണ്ണായക മൊഴിയുടെ അടിസ്ഥാനത്തിലാണ് മരട് പോലീസ് അന്വേഷണത്തിന് തുടക്കമിട്ടത്.(Kochi Maradu Kidnapping Case Solved Drug Gang Arrested With MDMA By Police)
സി.സി.ടി.വി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് വാഹനം പാലക്കാട് സ്വദേശി ഷഹനാസ് വി.പി.യുടേതാണെന്ന് തിരിച്ചറിഞ്ഞത്. ഇതോടെ കാപ്പ കേസ് പ്രതി തോപ്പുംപടി സ്വദേശി ഫ്രാൻസിസ് സേവ്യർ, കണ്ണൂർ സ്വദേശി അനൂപ് എന്നിവരിലേക്ക് അന്വേഷണം നീണ്ടു. കേസുമായി ബന്ധപ്പെട്ട് ഡാൻസാഫ് സംഘം വെണ്ണലയിൽ നടത്തിയ പരിശോധനയിൽ 4.48 ഗ്രാം എം.ഡി.എം.എയുമായി നാലുപേരെ അറസ്റ്റ് ചെയ്തു.
ഇവരെ ചോദ്യം ചെയ്തപ്പോഴാണ് തട്ടിക്കൊണ്ടുപോകപ്പെട്ട വ്യക്തി പ്രതികളിലൊരാളായ റിജോയ് ബിക്സൺ ഫ്രാൻസിസാണെന്ന ഞെട്ടിക്കുന്ന വിവരം പുറത്തുവരുന്നത്. ഷഹനാസിന്റെ സംഘത്തിൽ നിന്ന് വാങ്ങിയ ലഹരിമരുന്നിന്റെ പണത്തെച്ചൊല്ലിയുള്ള തർക്കമാണ് നാടകീയമായ തട്ടിക്കൊണ്ടുപോകലിൽ കലാശിച്ചതെന്ന് റിജോ പോലീസിനോട് സമ്മതിച്ചു. തുടർന്ന് നടത്തിയ സംയുക്ത ഓപ്പറേഷനുകളിൽ കലവൂരിൽ വെച്ച് ഫ്രാൻസിസ് സേവ്യർ, സുഹൃത്ത് ആര്യ, ഷഹനാസ്, അനൂപ് എന്നിവരെ എം.ഡി.എം.എയുമായി പിടികൂടി.
സ്മിജിൽ ആന്റണിയെ കണ്ണമാലിയിൽ നിന്നും നിഖിൽ കെന്ററിനെ മുളവുകാടിൽ നിന്നും മയക്കുമരുന്നുമായി പോലീസ് കസ്റ്റഡിയിലെടുത്തു. സംഭവവുമായി ബന്ധപ്പെട്ട് രജിസ്റ്റർ ചെയ്ത ആറ് വ്യത്യസ്ത കേസുകൾ സംയോജിപ്പിച്ചാണ് നിലവിൽ കൊച്ചി സിറ്റി പോലീസ് സമഗ്ര അന്വേഷണം നടത്തിവരുന്നത്. മയക്കുമരുന്ന് സംഘങ്ങൾക്കെതിരെ പരിശോധനകളും നടപടികളും കൂടുതൽ കർശനമാക്കുമെന്ന് സിറ്റി പോലീസ് കമ്മീഷണർ മുന്നറിയിപ്പ് നൽകി.
Story Summary
Kochi City Police solved the Maradu kidnapping case, uncovering a major drug network involved in a monetary dispute over MDMA. The victim was identified as a gang member, and key accused, including a KAAPA convict, were arrested with illicit substances across multiple raids.
