തിരുവനന്തപുരം: സംസ്ഥാനത്ത് പെയ്യുന്ന അതിതീവ്ര മഴയെത്തുടർന്ന് ഓഗസ്റ്റ് രണ്ട് ഞായറാഴ്ച നടത്താനിരുന്ന സെറ്റ് (SET) പരീക്ഷ മാറ്റിവെച്ചു (Kerala SET exam postponed). പുതുക്കിയ തീയതി പിന്നീട് പ്രഖ്യാപിക്കും. കൂടാതെ, ഓഗസ്റ്റ് രണ്ടിന് നിശ്ചയിച്ചിരുന്ന എല്ലാ പരീക്ഷകളും ശ്രീനാരായണഗുരു ഓപ്പൺ യൂണിവേഴ്സിറ്റിയും മാറ്റിവെച്ചിട്ടുണ്ട്. ഓഗസ്റ്റ് മൂന്ന് തിങ്കളാഴ്ച നടത്താനിരുന്ന വിവിധ പരീക്ഷകൾ എം.ജി സർവ്വകലാശാലയും മാറ്റിവെച്ചതായി അറിയിച്ചു.
അതേസമയം, പ്രകൃതിക്ഷോഭം കാരണം ഇന്ന് പരീക്ഷ എഴുതാൻ സാധിക്കാതെ പോയ കോട്ടയം, ഇടുക്കി, പത്തനംതിട്ട ജില്ലകളിലെ ഉദ്യോഗാർത്ഥികൾക്ക് വീണ്ടും പരീക്ഷയെഴുതാൻ അവസരം നൽകുമെന്ന് കേരള പി.എസ്.സി അറിയിച്ചു. പത്താം തരം പൊതുപ്രാഥമിക പരീക്ഷയുടെ മൂന്നും നാലും ഘട്ടങ്ങളിൽ പങ്കെടുക്കാൻ കഴിയാതിരുന്നവർക്ക് 2026 ഓഗസ്റ്റ് 22-ന് നടക്കുന്ന അവസാന ഘട്ട പരീക്ഷയിൽ പങ്കെടുക്കാം. പി.എസ്.സി പുറപ്പെടുവിക്കുന്ന പ്രത്യേക മാർഗ്ഗനിർദ്ദേശങ്ങൾ അനുസരിച്ച് ഉദ്യോഗാർത്ഥികൾ ഇതിനായി അപേക്ഷിക്കേണ്ടതുണ്ട്.
കായികക്ഷമതാ പരീക്ഷ മാറ്റിവെച്ചു
കനത്ത മഴ തുടരുന്ന സാഹചര്യത്തിൽ വനം വന്യജീവി വകുപ്പിലെ ബീറ്റ് ഫോറസ്റ്റ് ഓഫീസർ തസ്തികയിലേക്കായി ഓഗസ്റ്റ് 4, 5 തീയതികളിൽ ഇടുക്കി, മലപ്പുറം, വയനാട് ജില്ലകളിൽ നടത്താനിരുന്ന ശാരീരിക അളവെടുപ്പും കായികക്ഷമതാ പരീക്ഷയും മാറ്റിവെച്ചു. പുതുക്കിയ തീയതികൾ പിന്നീട് ഉദ്യോഗാർത്ഥികളെ അറിയിക്കുമെന്ന് അധികൃതർ വ്യക്തമാക്കി.
Story Summary:
Due to heavy rainfall in Kerala, the SET exam scheduled for August 2 and various university exams have been postponed. Kerala PSC announced re-examination options for candidate affected by rain in Kottayam, Idukki, and Pathanamthitta during the SSLC-level preliminary exams, while also rescheduling physical tests for Beat Forest Officer posts.
